जिंतूर - गेट बसवलेल्या बंधाऱ्यांमध्ये पाणीसाठा झाल्याने उन्हाळ्यात परिसरातील शेती सिंचनाची सोय झाली. परंतु गेट नसलेल्या बंधाऱ्यातील पाणी वाहून गेले. शेती सिंचनाच्या मुख्य उद्देशाने ओढा, नाला इत्यादी लहान जलप्रवाहांमध्ये अधिक पाणी अडविण्यासाठी कोल्हापूरी बंधारे बांधले जातात.

जिंतूर तालुक्यात डोंगराळ भाग असल्याने ग्रामीण भागातील सिंचनाची, पाणी टंचाईची समस्या लक्षात घेता आमदार मेघना साकोरे-बोर्डीकर यांच्या प्रयत्नातून महाराष्ट्र जलसंधारण महामंडळ (छत्रपती संभाजीनगर) विभागामार्फत आणि मृद व जलसंधारण विभाग परभणी या यंत्रणेद्वारे माथला येथे दोन, केहाळ येथे तीन, धमधम येथे दोन, पाचलेगाव, करंजी, पुंगळा, येनोली, चामणी, अकोली शिवारात प्रत्येकी एक याप्रमाणे एकूण १३ कोल्हापुरी पद्धतीचे बंधार्‍यांची कामे मंजूर करण्यात आली.

पैकी बहुतेक बंधार्‍यांमध्ये पाणी आडविल्यामुळे यावर्षीच्या पावसाळ्यात आणि या आठवड्यातील बिगरमोसमी पावसामुळे पाणीपातळीत बऱ्यापैकी वाढ होऊन लगतच्या विहिरीमध्ये देखील पाण्याची वाढ झाल्याचे दिसून येत आहे. यामुळे उन्हाळ्यामध्ये परिसरातील जनावरासाठी व शेतीसिंचनाची सोय उपलब्ध झाल्याने आजूबाजूंच्या शेतकऱ्यांना याचा लाभ होणार असल्याने समाधान व्यक्त होत आहे.

असे असले यातील काही बंधाऱ्यांसह वेगवेगळ्या विभागामार्फत बांधण्यात आलेल्या बंधाऱ्यांना अद्यापही गेट बसवले नाही,परिणामी पावसाळ्यातील पाणी वाहून जाते. त्यामुळे बंधारे निर्मितीचा उद्देश साध्य होत नसल्याने शासनाचा कोट्यावधीचा वाया जातो. याकडेही लोकप्रतिनिधी व संबंधित विभागाने लक्ष केंद्रित करण्याची गरज आहे.