जिंतूर ( जिल्हा परभणी ) : कोरोना या संसर्गाने संबंध जगाला वेठीस धरले आहे. याचा फटका सर्वांनाच बसला आहे. या भयावह परिस्थितीत उद्योग व्यवसायाला मात्र सक्षम ठेवणे आवश्यक आहे. असे मत भाजप उद्योग आघाडीचे प्रदेशाध्यक्ष प्रदीप पेशकार यांनी व्यक्त केले. 

मागील एक वर्षापासून सुक्ष्म, लघु व मध्यम उद्योग, व्यवसाय, छोटे दुकानदार याची अपरिमित हानी झालेलीच आहे. त्यात आता कोरोना महामारीची दुसरी लाट आली. त्यामुळे भयावह परिस्थिती निर्माण झाली आहे. अशा परिस्थितीत जनतेचे आरोग्य महत्वाचे आहे. त्याप्रमाणेच व्यवसाय उद्योगालासुद्धा सक्षम ठेवणे आवश्यक आहे. अन्यथा त्यांनाही आजारी घोषित करावे लागेल असे झाल्यास संपूर्ण अर्थव्यवस्था ज्या क्षेत्रावर मोठ्या प्रमाणात अवलंबून आहे असे व्यापारी व उद्योजक देशोधडीला लागतील व रोजगाराची सुद्धा मोठी समस्या निर्माण होईल. 

हेही वाचा - अनुसुचित जाती व अनुसूचित जमाती प्रवर्गासाठी ‘डॉ. बाबासाहेब आंबेडकर जीवन प्रकाश योजना’

मुख्यमंत्री उद्धव ठाकरे यांनी लॉकडाऊनची नवीन नियमावली जाहीर केली. त्यात प्रामुख्याने काही घटकांचा विचार केला परंतु सूक्ष्म, लघु व मध्यम उद्योग, सेवाउद्योग, छोटे दुकानदार, व्यावसायिक जे सर्वात जास्त रोजगार देतात असे व्यवसाय उद्योग यांच्यासाठी मात्र कुठल्याही प्रकारची दिलासादायक काहिच घोषणा नाही. तातडीने जीएसटी मधील सवलत, वीज बिलाची सवलत, मालमत्ता करातील सवलत, तसेच कामगारांचे पगार, जागेचे भाडे, बॅंकेच्या व्याजामध्ये सूट, सबसिडीचा ईलीजीबीलीटी कालावधीमधे दोन वर्षाची वाढ अशा कांही महत्त्वाच्या मागण्या या घटकाच्या आहेत. तरी राज्य सरकारने व मुख्यमंत्र्यांनी त्याचा विचार करून तातडीने दिलासा द्यावा अशी आमची मागणी आहे. अन्यथा या क्षेत्रातील सूक्ष्म व लघु उद्योजक तसेच छोटे दुकानदार, व्यवसायीक देशोधडीला लागतील. कामगारांची उपासमार होऊ होईल. पुढील कां ही दिवसात याचे भयावह परिणाम दिसण्याची शक्यता आहे. तरी शासनाने याविषयी गांभीर्याने निर्णय करणे गरजेचे आहे. असे उद्योग आघाडीचे प्रदेशाध्यक्ष श्री. पेशकार यांनी 'सकाळ' शी बोलताना त्यांचे मत मांडले. 

संपादन- प्रल्हाद कांबळे