देवगावफाटा/जिंतूर : बहिण- भावाच्या स्नेहाचे प्रतीक असणारा रक्षाबंधन या पवित्र सणासाठी बहिणींची आपापल्या बंधुराजाला साजेशी आणि सुबक राखी खरेदी करण्यासाठी बाजारपेठेत लगबग सुरू झाली आहे. मात्र, यंदा बहिण-भावाच्या या पवित्र सणाला महागाईचा फटका बसला आहे. कच्च्या मालाची दरवाढ झाल्याने राख्यांचे दर १५ ते २० टक्क्यांनी वाढले आहेत. बहिण- भावाचे नाते मायेच्या, प्रेमाच्या धाग्याने घट्ट बांधून ठेवणारा सण आज गुरुवारी (ता. ११) साजरा होत आहे. त्यानिमित्त रंगीबेरंगी, मनमोहन राख्या बाजारात विक्रीस आल्या आहेत. राख्यांचे विविध प्रकार बाजारात दिसून येत असले तरी रेशमी गोंड्याच्या राख्यांची मागणी पूर्वापार कायम आहे. मणी, टिकल्या, कुंदन, खडे यांचा वापर करून तयार केलेल्या राख्याही विक्रीस उपलब्ध आहेत.

दोन रुपयांपासून ते अडीचशे रुपयांपर्यंत राखीची किंमत सांगण्यात येत आहेत. फॅन्सी राख्याबरोरच धार्मिक राख्यांचाही समावेश आहे. त्यामुळे श्री ओम, स्वस्तिक, कमळ असलेल्या तसेच रूद्राक्षाच्या राख्यांचीही विक्री सुरू आहे. केवळ राखी नव्हे तर कायमस्वरूपी हातात राहील, म्हणून ब्रेसलेट सारख्या राख्याही बाजारात आल्या आहेत. २५० ते ४५० रुपयांपर्यंत ब्रेसलेट राख्या उपलब्ध आहेत. विविध आकारातील किंवा अमेरिकन डायमंड असलेले छोटे पदक धाग्यात गुंफलेल्या किंवा रंगीत मनी चांदीच्या गोफात बसविलेल्या राख्यांच्या किमती ३५० रुपयांपासून १००० रुपयांपर्यंत आहे. सुवर्णाकडे तर सोन्या चांदीच्या राख्याही तयार आहेत.

लहान मुलांसाठी आकर्षक राख्या

भिंतीवर चढणारा स्पायडरमॅन, मिकीमाऊस, डोनाल्ड डक, स्टोन राखी, डिस्को लाइट, जू-जू वंडरबॉय, टेडी बियर, छोटा भीम, डेरेमान, पोंगो, निंजा, हातोडी आदी राख्या यावर्षी लहान मुलांचे आकर्षण ठरल्या आहेत.

राख्यांमधील नावीन्यता

यावर्षी लायटिंग राखीमध्ये स्पीनर लायटिंग राखी आणि कपल राखी अर्थात महिला- पुरुष अर्थात दोघांसाठीही असलेल्या राख्या बाजारात आलेल्या आहेत. स्पीनर राखीस असलेले बटन दाबले की विविध रंगीत लायटींगने राखीची आकर्षिता वाढविते.

यंदा कच्च्या मालाच्या दरात वाढ झाल्याने राख्यांच्या दरात १५ ते ३० टक्क्यांनी वाढ झाली आहे. ५० रुपयांपासून ते ९०० रुपयांपर्यंत प्रती डझन राख्यांचे दर आहेत.

-संदीप माहूरकर, राखी विक्रेता, जिंतूर