भोकरदन (जिल्हा जालना): भोकरदन (Bhokaradan) शहरातील स्टेट बँक ऑफ इंडियाच्या शाखेत गुरुवारी (ता.17) पीक कर्जासंदर्भात विचारणा करण्यासाठी गेलेल्या एका शेतकऱ्याला बँकेतील काही अधिकारी व कर्मचाऱ्यांनी शिवीगाळ करीत बेदम मारहाण केल्याचा व्हिडीओ सोशल मीडियावर व्हायरल झाला होता. आज शुक्रवारी (ता.18) सकाळी संतप्त शेतकऱ्यांसह विविध राजकीय पक्ष व सामाजिक संघटनांच्यावतीने मारहाण करणाऱ्यांना तात्काळ निलंबित करून त्यांच्यावर गुन्हे दाखल करण्यात यावे यासाठी बँकेसमोर ठिय्या आंदोलन केले.

तालुक्यातील गव्हाण संगमेश्वर येथील शेतकरी गुरुवारी दुपारी बारा वाजेच्या सुमारास पीक कर्जासंदर्भात विचारणा करण्यासाठी भोकरदन शहरातील स्टेट बँक ऑफ इंडियाच्या शाखेत गेला होता. मात्र, काही तांत्रिक कारणांमुळे बँकेचा व्यवहार बंद असल्याने बँकेचे गेट बंद करण्यात आले होते. संबंधित शेतकऱ्यांने गेटमधून विचारणा केली असता. बँकेतील काही अधिकारी व कर्मचारी भडकले व त्यांनी संबंधित शेतकऱ्याला शिवीगाळ करून नंतर बँकेबाहेर येऊन बेदम मारहाण केली असल्याचा व्हिडीओ काही वेळातच सोशल मीडियावर मोठ्या प्रमाणावर व्हायरल झाला. या प्रकारामुळे शेतकऱ्यांसह अनेक पक्ष व सामाजिक संघटनांकडून संताप व्यक्त करण्यात आला. शेतकऱ्यांना अपमानास्पद वागणूक देऊन मारहाण करणाऱ्या बँकेतील अधिकारी कर्मचाऱ्यांवर तात्काळ निलंबनाची कारवाई करण्यात यावी या मागणीसाठी शुक्रवारी (ता.18) शहरातील छत्रपती शिवाजी महाराज चौकातील स्टेट बँक ऑफ इंडियासमोर संतप्त शेतकऱ्यांसह विविध राजकीय पक्ष व सामाजिक संघटनांनी ठिय्या आंदोलन केले.

यावेळी दिलेल्या निवेदनावर शिवसेनेचे तालुका संघटक महेश पुरोहित, युवक काँग्रेसचे जिल्हाध्यक्ष राहुल देशमुख, छावा संघटनेचे तालुकाध्यक्ष विष्णू गाढे, नानासाहेब वानखेडे, विशाल गाढे, राजेश साबळे, दिनेश पडोळ, गजानन गावंडे, विनोद मिरकर, आप्पासाहेब जाधव, श्रीमंता राऊत, सुरेश तळेकर, विकास जाधव, नारायण लोखंडे, मधुकर ढोले, विलास राऊत, ईश्वर इंगळे, अमोल जाधव, गणेश इंगळे, बबन जंजाळ, महेश औटी, कृष्णा तराळ, नारायण जिवरग यांच्यासह आदींच्या स्वाक्षरी आहेत.

25 जूनला शोले स्टाईल आंदोलन-

दरम्यान मारहाण प्रकरणाचे निवेदन उपविभागीय अधिकारी यांना देण्यात आले असून, मारहाण करणाऱ्या बँकेच्या अधिकारी, कर्मचाऱ्यांना तात्काळ सेवेतून बडतर्फ करा. अन्यथा येत्या 25 जूनला पाण्याच्या टाकीवर चढून शोले स्टाईल आंदोलन करण्यात येईल असा इशारा निवेदनातून देण्यात आला आहे.

'त्या' प्रभारी व्यवस्थापकावर गुन्हा दाखल-

शेतकरी मारहाण प्रकरणी स्टेट बँक ऑफ इंडियाचे प्रभारी व्यवस्थापक इम्रान पठाण यांच्याविरुद्ध मारोती सहाणे या शेतकऱ्याने भोकरदन पोलिसांत दिलेल्या तक्रारीनुसार गुन्हा दाखल करण्यात आला असल्याचे पोलिसांनी सांगितले.