जालना : औरंगाबाद येथून हैदराबादकडे जाणाऱ्या कांचनगुडा एक्स्प्रेस जालना तालुक्यातील दरेगाव शिवारात आली असता सोमवारी (ता.१५) सायंकाळी तरुण-तरुणीने रेल्वेखाली उडी घेऊन आत्महत्या केली. मृत तरुणीचे नाव शीतल शरद कान्हे (वय १९) असून ती अंबड तालुक्यातील पांगारखेडा येथील रहिवासी असल्याचे पोलिसांकडून सांगण्यात आले आहे. तर मृत तरुणाचे नाव तुषार प्रेमानंद रगडे (वय २०) असून तो चंदनझिरा भागातील राहणारा आहे, अशी ओळख त्या दोघांच्या आधार कार्डवरुन पटली आहे.

दरम्यान घटनेची माहिती मिळाल्यानंतर चंदनझिरा पोलिस ठाण्याचे पोलिस निरीक्षक यशवंत जाधव यांच्यासह अधिकारी, कर्मचाऱ्यांनी घटनास्थळी भेट दिली. दोघांचे मृतदेह उत्तरीय तपासणीसाठी जिल्हा रुग्णालयात दाखल केले. या प्रकरणी रात्री उशिरा चंदनझिरा पोलिस ठाण्यात नोंद करण्याची प्रक्रिया सुरू होती. या तरुण-तरुणीच्या आत्महत्येचे कारण समजू शकले नाही. मात्र ती प्रेमप्रकरणातून झाली असेल असा प्राथमिक अंदाज पोलिसांनी वर्तविला आहे.
 

संपादन - गणेश पिटेकर