जालना : शहरासह जिल्ह्यातील गुन्हेगारी नियंत्रणात आणण्यासाठी पोलिस प्रशासनाकडून हद्दपारी आणि एमपीडीएअंतर्गत पोलिस रेकॉर्डवरील गुन्हेगारांवर कारवाई केली जाते. त्यानंतर आजघडीला हद्दपारीचे २४ प्रस्ताव तर एमपीडीएअंतर्गत दोन प्रस्ताव निकालाच्या प्रतीक्षेत आहे.

गुन्हेगारीवर अंकुश ठेवण्यासाठी पोलिस प्रशासनाकडून हद्दपारी, एमपीडीए, मोक्का आदींच्या कारवाया केल्या जातात. एकाच गुन्हेगारांकडून सतत गुन्हे केल्यानंतर त्याला जिल्ह्याच्या हद्दीतून बाहेर काढले जाते.

सध्या परिस्थितीमध्ये पोलिस प्रशासनाकडून कलम ५५ अंतर्गत पोलिस अधीक्षक तुषार दोशी यांच्याकडे २९ संघटित गुन्हेगारांचे सहा प्रस्ताव निकालाच्या प्रतीक्षेत आहेत. तर कलम ५६ आणि कलम ५७ अंतर्गत संबंधित उपविभागीय अधिकाऱ्यांकडे १८ हद्दपारीचे प्रस्ताव निकालाधीन आहेत.

शिवाय जिल्हाधिकारी डॉ. विजय राठोड यांच्याकडे एमपीडीएअंतर्गत दोन प्रस्तावांवर सुनावणी सुरू आहे. शहरासह जिल्ह्यातील गुन्हेगारीच्या घटना पाहता या हद्दपारीसह एमपीडीए अंतर्गत दाखल झालेल्या प्रस्तावांवर लवकरच निर्णय होण्याची शक्यता आहे.

शिवाय हद्दपारीसह मोक्का अंतर्गत नवीन प्रस्ताव तयार करण्याचे निर्देश असल्याने पोलिस प्रशासनाकडून हे प्रस्ताव तयार करण्याची लगबग सुरू केली आहे. त्यामुळे जुन्या दाखल केलेले प्रस्ताव कधी निकाली निघणार याकडे सर्वांचे लक्ष आहे.

पोलिस रेकॉर्डवरील गुन्हेगारांविरोधात यापूर्वी कलम ५६ व ५७ अंतर्गत एकूण १८ हद्दपारीचे प्रस्ताव उपविभागीय अधिकारी यांच्याकडे पाठविलेले आहेत. तर कलम ५५ अंतर्गत सहा प्रस्ताव दाखल केले असून एमपीडीए अंतर्गत जिल्हाधिकारी यांच्याकडे दोन प्रस्ताव दाखल केलेले आहे. शिवाय नवीन हद्दपारीचे प्रस्ताव तयार करण्यासंदर्भात सूचना प्राप्त झाल्या आहे.

— रामेश्‍वर खनाळ, पोलिस निरीक्षक, स्थानिक गुन्हे शाखा, जालना.