जालना : जिल्ह्यात जून महिन्यात पावसाने ओढ दिली होती. मात्र, जुलै महिन्यापासून जिल्ह्यात पावसाला सुरवात झाली. मात्र, जून महिन्यापासून नैसर्गिक आपत्तीमुळे जिल्ह्यातील तब्बल नऊ जणांचा बळी गेला आहे. यापैकी सात जणांना शासनाकडून आर्थिक मदत करण्यात आली आहे. दरम्यान, ५८ पशुधन या नैसर्गिक आपत्तीमुळे दगावले आहेत. तर ठिकठिकाणी घरांचीही पडझड झाली आहे.

जिल्ह्यात जून महिन्यात पावसाने हुलकावणी दिल्यानंतर जुलै महिन्यापासून भिज पावसाला सुरू झाली आहे. मात्र, जिल्ह्यात अद्यापि सर्वदूर जोरदार पाऊस झालेला नाही. जिल्ह्यात यंदा अतिवृष्टीचा पिकांना फटका बसला नाही. मात्र, या काळात जिल्ह्यातील नैसर्गिक आपत्तीमुळे जिल्ह्यातील नऊ जणांचे बळी गेले आहेत.

यामध्ये तीन जणांचा मृत्यू हा पुरात वाहून गेल्याने झाला आहे. तर सहा जणांचा वीज कोसळून मृत्यू झाला आहे. जिल्ह्यात नैसर्गिक आपत्तीमुळे मृत्यू झालेल्या या नऊ जणांपैकी आठ जणांचे प्रस्ताव शासकीय मदतीसाठी पात्र ठरले आहेत. त्यांपैकी आतापर्यंत सात मृतांच्या नातेवाइकांना शासकीय नियमानुसार प्रशासनाकडून एकूण २८ लाखांची आर्थिक मदत देण्यात आली आहे.

जिल्ह्यात २२ घरांची ही पडझड

जिल्ह्यात नैसर्गिक आपत्तीमुळे जिल्ह्यातील २२ घरांची पडझड झाली आहे. यामध्ये आठ पक्क्या घरांची पडझड झाली. यापैकी पाच घरे आर्थिक मदतीसाठी पात्र झाले आहेत. तर जिल्ह्यातील १४ कच्च्या घरांची पडझड झाली आहे. त्यांपैकी ११ कच्चे घरे हे शासकीय आर्थिक मदतीसाठी पात्र झाले आहेत.

५२ पशुधन दगावले

नैसर्गिक आपत्तीमुळे आतापर्यंत ५८ पशुधनही दगावले आहे. यात २४ दुधाळ पशुधनाचा तर आठ लहान पशुधनाचा समावेश आहे, शिवाय २० ओढकाम करणाऱ्याचा पशुधनाचा तर एका लहान ओढकाम करणाऱ्या पशुधनाचा मृत्यू झाला आहे.