जालना : जालना शहराचा विस्तार झाल्याने घरांची संख्या देखील वाढली आहे. त्यामुळे महापालिकेच्या कराच्या स्वरूपात येणाऱ्या रकमेतही वाढ होणार आहे. मात्र, आज घडीला जालनेकरांकडे तब्बल ११२ कोटींचा कर थकीत आहे. यात ८१ कोटी ८८ लाखांचा कर मागील अनेक वर्षांचा थकीत आहे. त्यामुळे महापालिका प्रशासन आता मालमत्ता जप्तीच्या तयारीला लागली आहे.

जालना शहराचा होणारा विस्तार लक्षात घेता राज्य शासनाकडून येथे महापालिकेची स्थापन केली गेली. महापालिका झाल्यानंतर शहरातील नागरी सुविधांमध्ये सुधारणा होईल, अशी अपेक्षा होती. महापालिकेच्या तिजोरी नळपट्टी, घर पट्टीच्या करातून मोठी रक्कम येते. मात्र, पालिका झाल्यापासून वर्षानुवर्ष कोट्यवधींचा कर थकीत असल्याने महापालिकेच्या तिजोरीत खडखडाट आहे.

त्यामुळे यंदाच्या मार्च अखेरपर्यंत महापालिकेका कर वसुलीवर अधिक लक्ष देण्याची तयारीत आहे. कारण यंदा महापालिकेला चालू वर्षातील ३० कोटी ६३ लाख ६१ हजारांचा कर वसुल करायचा आहेत. तर मागील थकीत तब्बल ८१ कोटी ८८ लाख ३५ हजार आहे. एकूण ११२ कोटी ५१ लाख ९६ हजारांचा कर वसुल करण्याचे महापालिकेसमोर आव्हान आहे. त्यामुळे महापालिकेकडून आज घडीला कर वसुलीसाठी २२ अधिकारी, कर्मचारी नेमण्यात आले असून कर वसुली सुरू केली आहे.

ता.३१ डिसेंबरपर्यंत पाच कोटी ५४ लाख ९६ हजारांचा कर महापालिकेकडून वसूल करण्यात आला आहे. कर वसुलीची रक्कम अधिक असल्याने महापालिकेने वर्षानुवर्ष कर थकवणाऱ्यांच्या मालमत्ता जप्तीची तयारी सुरू केली आहे. त्यामुळे यंदा जालनेकरांनी कर न भरल्यास महापालिकेच्या मालमत्ता जप्तीच्या कारवाईला सामोरे जावे लागणार आहे. तर डिसेंबर २०२३ अखेर महापालिकेने पाच कोटी ५४ लाख ९६ हजारांची कर वसुली केली आहे. जानेवारी महिन्यात करण्यात आलेल्या कर वसुलीची लेखा-जोखा महिना अखेरीस केला जाणार आहे, असे सांगण्यात आले.

महापालिकेने कर वसुली मोहीम सुरू केली आहे. ज्या मालमत्ताधारकांकडे मोठ्या प्रमाणात कराची रक्कम थकीत आहे, अशा करधारकांच्या याद्या काढण्याचे काम सुरू केले आहे. जर या करधारकांनी कर भरला नाही तर त्यांच्या मालमत्ता महापालिकेकडून जप्त केल्या जातील.

— संतोष खांडेकर,

आयुक्त, शहर महापालिका, जालना.