जालना : जिल्हा परिषदेचे मुख्य कार्यकारी अधिकारी मनोज जिंदल यांच्या पुढाकाराने राबविण्यात येत असलेल्या मिशन कवच कुंडल अभियानामुळे कोरोना प्रतिबंधक लसीकरणाला जिल्ह्यात बुस्टर मिळत आहे. दरम्यान, आरोग्य विभागातर्फे शनिवारी (ता.१९) दिवसभरात २७ हजार २७३ जणांना लस टोचण्यात आली. जिल्ह्यात शनिवारपर्यंत एकूण ७ लाख १२ हजार १६४ जणांना पहिला तर २ लाख ५८ हजार ६२७ जणांना दुसरा डोस असे एकूण ९ लाख ७० हजार ७९१ इतके लसीकरण झाले आहे.

जिल्ह्यात आरोग्य विभागासह शिक्षण विभागही लसीकरणाबाबत जागृती करीत आहे. त्यामुळे गेल्या काही दिवसांपासून लसीकरणाला प्रतिसाद वाढला आहे. दरम्यान, शनिवारी ठिकठिकाणी लसीकरण झाले. यात ३७ फ्रन्टलाइन वर्करला दुसरा डोस देण्यात आला. १८ ते ४४ वर्ष वयोगटातील १२ हजार ६६२ जणांना पहिला डोस व ४ हजार ४७४ जणांना दुसरा डोस असे १७ हजार १३६ जणांचे लसीकरण झाले.

याशिवाय ४५ ते ६० वर्ष वयोगटातील ३ हजार ६४१ जणांना पहिला डोस व २ हजार २२ जणांना दुसरा डोस असे ५ हजार ६६३ जणांचे लसीकरण झाले. ६० वर्ष वयोगटावरील २ हजार ७७४ जणांना पहिला डोस व १ हजार ६६३ जणांना दुसरा डोस असे ४ हजार ४३७ जणांचे लसीकरण झाले. यात एकूण १९ हजार ७७ जणांना पहिला तर ८ हजार १९६ जणांना दुसरा असे एकूण २७ हजार २७३ जणांचे शनिवारी लसीकरण झाले आहे, असे आरोग्य विभागाने कळविले आहे.