Beed News : मनोज जरांगे पाटील यांची आज शनिवारी येथे होत असलेल्या निर्णायक इशारा सभेत ते काय बोलणार याकडे राज्याचे लक्ष लागले आहे. दरम्यान, मनोज जरांगे पाटील यांची शहरातून फेरी निघाली आहे. त्यांच्यावर हेलिकॉप्टरसह २०१ जेसीबींमधून पुष्पवृष्टी केली जाणार आहे.

मनोज जरांगे पाटील यांनी दोन वेळा अंतरवाली सराटी (ता. अंबड, जि. जालना) येथे समाजाला सरसकट कुणबी प्रमाणपत्र व आरक्षण मिळावे, यासाठी दोन वेळा उपोषणे केली. दुसऱ्यांदा केलेल्या उपोषणानंतर सरकारने मागीतलेली व श्री. जरांगे पाटील यांनी दिलेली मुदत २४ डिसेंबरला संपत आहे.

त्यामुळे बीडमध्ये होत असलेल्या सभेला निर्णायक इशारा सभा नाव देण्यात आले आहे. सभेची संयोजकांनी जय्यत तयारी केली आहे. शंभर एकरांवर तयार केलेल्या मैदानाला पाटील मैदान असे नामकरण करण्यात आले आहे.

सभेसाठी मनोज जरांगे पाटील शुक्रवारी रात्रीच जिल्ह्यात दाखल झाले आहेत. सभेची मागच्या १० दिवसांपासून जिल्ह्यात जनजागृती करण्यात येत आहे. शहरात सर्वत्र कमानी, बॅनर व भगवे झेंडे लागले आहेत.

दरम्यान, सभेच्या अनुषंगाने मनोज जरांगे पाटील यांच्या शहरातून फेरीला सुरुवात झाली आहे. भारतरत्न डॉ. बाबासाहेब आंबेडकर पुतळ्याला अभिवादन करुन फेरी सुरु झाली आहे. त्यानंतर सुभाष रोडवर आलेल्या फेरीने लोकशाहीर अण्णाभाऊ साठे पुतळ्याला अभिवादन केले. यानंतर छत्रपती शिवाजी महाराज यांच्या पुतळ्यालाही अभिवादन करण्यात आले.

या ठिकाणी मनोज जरांगे पाटील यांचे जोरदार स्वागत करण्यात आले. सभेवेळी मनोज जरांगे पाटील यांच्यावर हेलिकॉप्टरसह २०१ जेसीबींमधून पुष्पवृष्टी करण्यात येणार आहे. सभेत मनोज जरांगे पाटील आता काय निर्णायक भूमिका मांडणार याकडे लक्ष लागले आहे.