लातूर : तत्कालीन पंतप्रधान इंदिरा गांधी यांनी खासगी बँकांचे राष्ट्रीयीकरण केले. त्यानंतर बँकांच्या शाखांचा विस्तार होत गेला. या घटनेला ५२ वर्ष उलटल्यानंतर सध्याचे सरकार या बँकांचे खासगीकरण करू पाहत आहे. या खासगीकरणाला विरोध करण्यासाठी महात्मा गांधी यांच्या जयंतीचे औचित्य साधून शनिवारी (ता. दोन) महाराष्ट्र स्टेट बँक एम्प्लॉईज फेडरेशनच्या वतीने स्वाक्षरी मोहिमेची सुरवात करण्यात आली.

प्रा. रणसुभे व स्वाभिमानी शेतकरी संघटनेचे अरुण कुलकर्णी यांच्या हस्ते मोहिमेची सुरवात झाली. श्री. कुलकर्णी यांनी शेतकरी व राष्ट्रीयकृत बँकांतील अतूट नात्याविषयी माहिती देत खासगीकरणाच्या विरोधात गावात जाऊन ग्रामसभेच्या माध्यमातून जागृती करणार असल्याचे सांगितले. बँक कर्मचाऱ्यांचे नेते उत्तम होळीकर यांनी अभिनव उपक्रमातून खासगीकरण धोरणाची जनजागृती करून हे खासगीकरण परतवून लावणार असल्याचे सांगितले. या मोहिमेत सर्व घटकांतील नागरिकांच्या स्वाक्षऱ्या घेण्यात येत असून, त्यांना खासगीकरणाचे तोटे पटवून सांगण्यात येणार आहे. या स्वाक्षऱ्यांचे निवेदन पंतप्रधान नरेंद्र मोदी व लोकसभा सभापती ओम बिर्ला यांना देऊन खासगीकरण करून नये, अशी मागणी करण्यात येणार असल्याचे श्री. होळीकर यांनी सांगितले.

______________________________________________________________________________