उदगीर (जि.लातूर) : उदगीर शहरातील सर्व आस्थापनांच्या व्यावसायिकांना व त्यात काम करणाऱ्या नोकरांची कोरोना चाचणी बंधनकारक करण्यात आली आहे.रविवारी (ता.२१) पर्यंत या चाचण्या नाही केल्यास संबंधित अस्थापना बंद करून दंडात्मक कार्यवाही करण्याचा इशारा नगरपालिकेचे मुख्याधिकारी भारत राठोड यांनी दिला आहे. कोरोना संसर्गजन्य परिस्थितीच्या पार्श्वभूमीवर जिल्हाधिकार्‍यांनी कडक निर्बंध घालून दिले आहेत. रात्री आठ ते पहाटे पाचपर्यंत संचारबंदी लागू करण्यात आली आहे. शिवाय बाजारपेठेतील गर्दी टाळण्यासाठी नागरिकांना आवाहनही करण्यात आले आहे.

मात्र नागरिक या नियमांचे पालन करताना दिसून येत नाहीत, अशी परिस्थिती आहे.
शहरातील सर्वच बाजारपेठेमधील व्यावसायिकांना व त्यात काम करणाऱ्या नोकरांची कोरोना चाचणी बंधनकारक करण्यात आलेली आहे. सर्वांनी तपासण्या करून घेऊन निगेटिव्ह रिपोर्ट आपल्या दुकानात दर्शनी भागावर लावून ठेवावे असे, आवाहन नगरपालिकेच्या वतीने श्री.राठोड यांनी गुरुवारी (ता.१८) पत्राद्वारे केले आहे.

सोमवारपासून महसुल, पोलिस व नगरपालिका विभागाचे अधिकारी कर्मचारी यांनी पाहणी करत असताना तपासणी केली नसल्याचे आढळल्यास अशा संबंधित व्यावसायिकांची दुकाने बंद करून त्यांच्यावर दंडात्मक कारवाई करण्यात येणार असल्याचेही पत्रामध्ये नमूद करण्यात आले आहे.

आठवडे बाजार सुरूच....
कोरोना संसर्ग रोखण्यासाठी जिल्हाधिकाऱ्यानी आठवडे बाजार बंद करण्याचा निर्णय घेऊन तसे आदेशही काढले. परंतु गुरुवारी  येथील आठवडे बाजार सुरूच असल्याचे दिसून आले. येथील महाराष्ट्र राज्य विद्युत वितरण कंपनीच्या शेजारी असलेल्या शेळी बाजारात मोठ्या प्रमाणावर शेळ्यांची, कोंबड्यांची व इतर घटकांची मोठ्या प्रमाणावर खरेदी विक्रीचे व्यवहार झाले. त्यानंतर उशिरा नगरपालिकेचे अधिकारी तेथे दाखल झाले व बाजारावर निर्बंध घालण्यात आल्याचे सांगून तो बाजार बंद करावयास लावला.

संपादन - गणेश पिटेकर