निलंगा - केंद्रात आणि राज्यात भाजपचे सरकार असताना निलंगा विधानसभेचे आमदार माजी संभाजीराव पाटील निलंगेकर यांनी आपले राजकीय वजन मुख्यमंत्री व उपमुख्यमंत्री यांच्या जवळ वापरून पाण्याच्या संदर्भातील धोरणात्मक निर्णय घ्यावा जिल्हाभर जलसाक्षरता रॕली काढून जनतेची दिशाभूल थांबवावी अशी टीका काका अशोकराव पाटील निलंगेकर यांनी पुतणे आमदार संभाजी पाटील निलंगेकर यांच्यावर प्रसिद्धीपत्रकाच्या माध्यमातून केली आहे.

त्यांनी दिलेल्या प्रसिद्धी पत्रकात असे नमुद केले आहे की, मराठवाड्याला चार मुख्यमंत्री मिळाले मात्र पाण्यासाठी कोणीही प्रयत्न केले नाहीत असा आरोप जलसाक्षरता रॅलीच्या माध्यमातून संभाजीराव पाटील निलंगेकर करत आहेत. मात्र संपूर्ण महाराष्ट्रात सिंचनाचे जनक म्हणून ओळख असलेले माजी मुख्यमंत्री कै. डॉ. शिवाजीराव पाटील निलंगेकर यांनी लोअर तेरणा धरणाच्या माध्यमातून निलंगा शहराला पिण्याचे पाणी आणले. ८५ किमीचा डावा व उजवा कालवा आणला.

जिल्ह्यातच नव्हेतर मराठवाड्यासह संपूर्ण महाराष्ट्रात त्यांनी जलस्रोत निर्माण केले आहेत. यामध्ये जायकवाडी, विष्णुपुरी, माजलगाव येथील सिंदफणा धरण, तेरणा, मांजरा, गोदावरी, आदी नदयांवर अनेक ठिकाणी बॅरेजेस बांधून जल- सिंचनाची सुविधा तसेच पिण्याच्या पाण्याच्या सुविधा निर्माण केल्या.

लातूर जिल्ह्यात तावरजा, धनेगाव, घरणी, मसलगा, गिरकचाळ, साकोळ अशा विविध ठिकाणी बॅरेजस निर्माण करून लाखो हेक्टर जमीन ओलिताखाली आणली. लातूर शहराला पाणीच आणायचे असेल तर स्व. विलासराव देशमुख यांनी मुख्यमंत्री असताना उजनी धरणातून लातूरला १२ टीएमसी पाणी आणण्याचे निश्चित केले होते. ते आणण्यासाठी आपण प्रयत्न करावेत असे आवाहन अशोकराव पाटील निलंगेकर यांनी केले आहे.

कै. निलंगेकर साहेबांनी आपल्या भागातील नागरिकांची गैरसोय होऊ नये म्हणून जिल्ह्याच्या ठिकाणची सर्व कार्यालय निलंगा येथे आणली होती.

शेतकऱ्यांना मदत द्या

दोन आमदारांच्या आपापसातील मतभेदांमुळे तालुक्यातील कार्यालये पळवली जात आहेत. सध्या मतदारसंघात दुष्काळ पडला आहे. पाऊस पडत असल्याने खरीपातील पिक नष्ट होऊन शेतकऱ्यांवर दुःखाचा डोंगर कोसळला आहे. त्यांना मदत मिळवून देण्यासाठी प्रयत्न करावेत असा सल्लाही त्यांनी दिला आहे.