लातूर : गेल्या वर्षांपासून लातूरकरांना दहा दिवसांतून एकदा पाणीपुरवठा केला जात होता. यात लातूरकरांना दिलासा देत पालकमंत्री अमित देशमुख यांच्या सूचनेनंतर महापालिकेने आता सात दिवसांतून एकदा पाणीपुरवठा करण्याचा निर्णय घेतला आहे, अशी माहिती महापौर विक्रांत गोजमगुंडे यांनी दिली.

लातूरला गेल्या अनेक वर्षांपासून तीव्र पाणीटंचाईला सामोरे जावे लागत आहे. २०१५ मध्ये मांजरा धरण कोरडे पडल्याने लातूरला नळाद्वारे पाणी पुरवठा बंद झाला होता. शहराने रेल्वेने पाणीपुरवठा करावा लागला होता. प्रत्येक नगरात टँकरने फक्त दोनशे लिटर पाणी दिले गेले होते. त्यानंतर २०१६ आणि २०१७ मध्ये चांगला पाऊस झाला होता. तरी देखील लातूरला दररोज पाणीपुरवठा केला जात नव्हता. महापालिकेच्या वतीने सात दिवसातून एकदा पाणी पुरवठा केला जात होता. त्यात गेल्या वर्षी पावसाळ्यात समाधानकारक पाऊस झाला नाही. त्यामुळे लातूरला पाणीपुरवठा करणाऱ्या मांजरा धरणात पाणी आले नव्हते.

वाचा ः कोरोना विषाणू प्रतिबंधासाठी २२ अधिकाऱ्यांची नियुक्ती

२०१५ पेक्षा भयानक परिस्थिती निर्माण होते की काय अशी भिती वाटत असतानाच परतीच्या पावसाने थोडासा दिलासा दिला होता. मांजरा धरणात मृतसाठ्यात पाणी आले. तसेच शहराला पाणी पुरवठा करणाऱ्या नागझरी, साई बंधाऱ्यातही पाणी आले होते. त्यामुळे पावसाळ्यापासून लातूरला दहा दिवसातून एकदा पाणीपुरवठा केला जात आहे. कोरोना विषाणू संसर्ग रोखण्यासाठी वेगवेगळ्या उपाय योजना केल्या जात आहेत. लातूरकर ही त्याला प्रतिसाद देत आहेत.

हेही वाचा ः कोरोनाला रोखण्यासाठी सव्वापाच कोटी, लातूर जिल्हा नियोजन समितीचा निर्णय

पण नागरिकांत कोरोनाची भीती आहे. त्यामुळे एखादा व्यक्ती बाहेरून घरात आली की कपडे धुण्यासाठी टाकणे, स्नान करणे असे प्रकार करावे लागत आहेत. यातून पाण्याच्या जास्त वापर होत आहे. लातूरकराची पाण्याची गरज लक्षात घेऊन पालकमंत्री अमित देशमुख यांनी सात दिवसातून एकदा लातूरला पाणीपुरवठा करावा अशा सूचना महापालिकेला दिल्या होत्या. त्यानंतर महापालिकेने लातूरला गुरूवारपासून (ता.२६) सात दिवसांतून एकदा पाणीपुरवठा करण्याचा निर्णय घेतला आहे, अशी माहिती महापौर विक्रांत गोजमगुंडे यांनी दिली. या निर्णयामुळे लातूरकरांना थोडासा दिलासा मिळाला आहे.
---