औरंगाबाद : कामाचे पैसे दिले नाही म्हणून वाळूज एमआयडीसी परिसरातील कंपनीच्या 75 वर्षीय मालकाचा फावड्याने खून करणाऱ्या कामगाराला जन्मठेप व एक हजार रुपये दंडाची शिक्षा जिल्हा व सत्र न्यायाधीश के. आर. चौधरी यांनी ठोठावली. 

खुनाच्या घटनेनंतर काही दिवसांनी आरोपी स्वत: मुंबईच्या न्यायनगर पोलिस ठाण्यात हजर झाला होता व त्याने गुन्ह्याची कबुली दिली होती. गणेश येवले (रा. कौसल्यानगर, ता. हदगाव, जि. नांदेड, ह. मु. पंढरपूर, वाळूज एमआयडीसी) असे त्याचे नाव आहे. 

10 जुलै 2016 ला गणेश येवले याने मुंबईच्या न्यायनगर पोलिस ठाण्यात हजर होत, 'कंपनी मालक रामेश्‍वर दरक यांच्याकडे कामाचे पैसे मागण्यासाठी गेलो असता त्यांनी नकार दिला. त्यामुळे त्यांच्याच वाळूज एमआयडीसी परिसरातील गोडाऊनमध्ये त्यांचा खून केल्याची' कबुली पोलिस ठाण्यात दिली.

प्रकरणात एम वाळूज पोलिस ठाण्याचे पोलिस उपनिरीक्षक भास्कर खरात यांच्या तक्रारीवरुन गुन्हा दाखल करण्यात आला होता. खटल्यावेळी, सहाय्यक सरकारी वकील राजू पहाडिया यांनी दहा साक्षीदारांचे जबाब नोंदवले.

यामध्ये घटनेदिवशी कंपनीत जाताना व येताना आरोपीला पाहणाऱ्या एकाची साक्ष महत्वपूर्ण ठरली. त्याच साक्षीदाराच्या नातेवाईकाच्या शिफारसीवरुन आरोपीला काम मिळाले होते व घटनेनंतर कंपनीच्या मालकाचा खून केल्याचे आरोपीने साक्षीदाराला सांगितले होते. दोन्ही बाजुंच्या युक्तिवादानंतर व साक्ष-पुराव्यांवरुन न्यायालयाने आरोपीला जन्मठेप व एक हजार रुपये दंड व दंड न भरल्यास 15 दिवस सक्तमजुरीची शिक्षा ठोठावली