नांदेड : पैशाच्या देवाण- घेवाणीतून घरात बोलावून एकाचा खून करणाऱ्या महिलेस येथील प्रमुख जिल्हा न्यायाधिश दीपक ढोलकिया यांनी सोमवारी (ता. 13) जन्मठेप व दहा हजाराच्या दंडाची शिक्षा सुनावली. 

यवतमाळ जिल्ह्यातील वणी येथील परंतु सध्या सारखणी येथेच वास्तव्यास असलेला राहणारा सुरेश खेकार हा पैशाची देवाण- घेवाण करीत असे. त्याने सारखणी (ता. किनवट) येथील जनाबाई रमेश पवार (वय 45) या महिलेला पैसे दिले होते. यातून त्यांचा वाद होत असे. ता. 17 मे 2016 ला सुरेश खेकारे यांचा मुलगा कुणाल हा माहूरला गेला होता. तेथून त्याने आपल्या वडिलांना फोन लावला असता फोन लागत नसल्याने तो परत घरी आला. बाबा कुठे गेले असे त्याने आईला विचारले असता आईने सांगितले की, तुझे बाबा साकळी गेले ते अद्याप आले नाही. तेव्हा कुणाल हा गावात पाहण्यासाठी गेला असता जनाबाई पवार हिच्या घरातून वडिलाच्या ओरडण्याचा आवाज ऐकू आला, मात्र आत जाण्याची हिंम्मत नसल्याने तो तेथून निघून गेला. या दरम्यान जनाबाई पवार व तीच्या साथीदारांनी सुरशे खेकार याच्या डोक्यात जबर मारून खून केला. ही घटना ता. 18 मे 2016 च्या रात्री घडल्याचे पोलिसांनी सांगितले. रमेश शामराव खेकारे यांच्या फिर्यादीवरुन जनाबाई रमेश पवार, गंगाबाई उत्तम चव्हाण, प्रफुल्ल उत्तम चव्हाण, दिनेश उत्तम चव्हाण यांच्याविरूध्द सिंदखेड पोलिस ठाण्यात खूनाचा गुन्हा दाखल करण्यात आला. फौजदार आर. के. खरात यांनी तपास करून न्यायालयात दोषारोपपत्र दाखल केले. प्रमुख जिल्हा न्यायाधीश दीपक ढोलकिया यांनी या प्रकरणात 13 साक्षिदार तपासले. सरकार पक्षाची बाजू ॲड. रणजीत देशमुख यांनी मांडली. तर आरोपींचा बचाव ॲड. पी. एन. शिंदे यांनी केला. दोन्ही युक्तीवाद ऐकून न्यायाधिश ढोलकिया यांनी जनाबाई पवार हिला जन्मठएप व दहा हजाराच्या दंडाची शिक्षा सुनावली. तर गंगाबाई चव्हाण, प्रफुल्ल चव्हाण आणि दिनेश चव्हाण यांना सबळपुराव्या आधारे निर्दोष मुक्त केले.