परभणी : मी कुठेही गेलेलो नाही. मी मुंबईतच आहे. मला कुठे जाण्याची गरज नाही असे स्पष्टीकरण परभणीचे आमदार डॉ. राहूल पाटील यांनी सोमवारी (ता.२७) सकाळशी बोलतांना दिले. राज्यात सध्या सुरु असलेला सत्तासंघर्ष आता शिगेला पोहचला आहे. शिवसेनेला मोठे भगदाड पडले असून जवळपास ४० च्यावर आमदार सध्या एकनाथ शिंदे गटात सहभागी झालेले आहेत. हे सर्व आमदार सध्या गुहाआटी येथे वास्तव्यास आहेत. त्यातच सोमवारी (ता.२७) सायंकाळी परभणीचे शिवसेनेचे आमदार डॉ. राहूल पाटील हे सुरत मार्गे गुहाआटीला गेल्याची अफवा पसरली होती.

या संदर्भात थेट आमदार डॉ. राहूल पाटील यांच्याशी संपर्क साधला असता ते म्हणाले, की मी कुठेही गेलेलो नाही. मी मुंबईतच आहे. मला कुठे जाण्याची गरज नाही. मी कालच युवासेनेच्या पदाधिकारी व कार्यकर्त्यांच्या बैठकीला हजर होतो. त्या बैठकीस पर्यटन मंत्री अदित्य ठाकरे हे देखील हजर होते. माझ्या बद्दल ज्यांनी कोणी अफवा पसरवली असेल. त्यांना माझी विनंती आहे की, एखाद्या लोकप्रतिनिधी विषयी असे चुकीचे संदेश देवून संभ्रम निर्माण करू नये.