भारतरत्न स्वरसम्राज्ञी लता मंगेशकर साहित्यनगरी (उदगीर) - ‘ये सनम ऑँखों को मेरी खूबसूरत साज दे, येऊनी स्वप्नात माझ्या एकदा आवाज दे’ या दख्खणी कवितेसह ओवी, अभंग, चारोळी मुक्तछंद या अन् इतर छंद प्रकारातील कवितांनी ९५ व्या अखिल भारतीय मराठी साहित्य संमेलनाचा मुख्य सभामंडप सजलाय. त्यामुळे प्रेक्षकांतून किंवा व्यासपीठावरून कुठेही मान वळवली तरी सुंदर कविता असलेले फलक अन् त्याला साजेशा चित्रांचा सभोताल नजरेच्या टापूत येत आहे. संमेलनाच्या मुख्य सभामंडपात उद्‍घाटन आणि इतर महत्त्वाचे कार्यक्रम आहेत. त्यामुळे इतर व्यासपीठापेक्षा या ठिकाणी गर्दीही अधिक आहे. गर्दीमुळे या ठिकाणी उकाडाही अधिक जाणवत आहे. पण, या उकाड्यातही भिंतीवर असलेल्या या २६ कविता गारवा देत आहेत.

‘अरे घरोटा घरोटा तुझ्यातून पडे पिठी, तसं माझं गाणं पोटातून येते व्हटी’

कवी बहिणाबाई चौधरी यांच्या देवीवर वृत्तातील या रचेनेसह अलीकडील अनेक नवोदित कवींच्या मुक्तछंदातील रचनांचाही यामध्ये समावेश आहे. सहजतेने रसिकांच्या दृष्टीस पडेल अशा या दालनाला ‘कविताचित्रे’ असे समर्पक नाव आयोजकांनी दिले आहे. या दालनाची संकल्पना ज्येष्ठ पत्रकार जयप्रकाश दगडे यांची आहे. कवितेला अनुसरून चित्रकार शिवाजी हांडे (लातूर) यांनी सुंदर अशी रेखाटने केली आहेत. कवितांची निवड श्री. दगडे, योगीराज माने, रमेश चिल्ले यांनी केली.

ही जाणवली उणीव

ही संकल्पना अत्यंत चांगली आहे. तिला रसिकांचा प्रतिसादही मिळत आहे. या कविताचित्र दालनासाठी उत्तम कवितांची निवड केली. पण, ज्यांच्या कविता आहेत त्यांची नावे या कवितेसोबत दिलेली नाहीत. तीही आयोजकांनी दिली असती तर सभागृहात टांगलेल्या या कवितांना ‘चार चॉँद’ नक्कीच लागले असते, अशी प्रतिक्रियाही काही रसिकांनी व्यक्त केली.