माजलगाव (बीड): माजलगाव तालुक्यातील तालखेड, खेर्डा, एकदरा, तेलगाव, पुंगणी, डूबा, इर्ला या गावांना जाण्यासाठी पक्का रस्ता अद्यापही बांधण्यात आलेला नाही. परिणामी ग्रामस्थांना अनेक अडचणींना तोंड द्यावे लागत आहे. गावकऱ्यांना दररोज मरण यातना भोगाव्या लागत आहेत. प्रशासन आणि लोकप्रतिनिधींनी याची दखल घेत तातडीने उपाययोजना करणे आवश्यक आहे.

जिल्ह्यातील गेवराई आणि माजलगाव तालुक्याच्या सीमेवर असणारी तालखेड, तेलगाव, पुंगणी, एकदरा, खेर्डा, इर्ला, डूबा या गावांचा काही वर्षांपूर्वी गेवराई मतदार संघांत समावेश झाला. त्यामुळे माजलगाव बरोबरच आता गेवराई प्रशासनही गावांच्या विकासासाठी मदत करेल अशी अपेक्षा या भागातील लोकांना होती. मात्र झाले उलटेच. कोणीही याकडे लक्ष दिले नाही. या दोन्ही प्रशासकीय यंत्रणेच्या कचाट्यात ही गावे सापडली असून विकासाची वाट शोधत आहेत. या गावांकडे जाण्यासाठी रस्ताही चांगला तयार करण्यात आलेला नाही.

तालखेड जवळूनच राष्ट्रीय महामार्ग गेलेला असला तरी त्या राष्ट्रीय महामार्गापासून गावात येण्यासाठी गावकऱ्यांना कसरत करावी लागते. जागोजागी खड्डे पडले आहेत. या खड्ड्यांतून मार्ग काढत ग्रामस्थांना प्रवास करावा लागतो. हा जीवघेणा प्रवास करीत असताना अनेक अपघात होतात. या अपघातांत अनेक जखमी झाले आहेत. वेळोवेळी या भागातील नागरिकांनी पुढाऱ्यांना विनवण्या केल्या मात्र केवळ आश्‍वासनाशिवाय काहीच मिळाले नाही. निवडणूक आली की रस्ता करण्याचे गाजर दाखवले जाते. मात्र निवडणूक झाल्यानंतर कोणीही लक्ष देत नाही. प्रशासनाने याची दखल घेत तातडीने उपाययोजना करावी अशी मागणी जोर धरत आहे.