वडीगोद्री (जि. जालना) : ‘‘मी वैद्यकीय उपचार घेणार नाही. मला झोपेत सलाईन लावू नका. सलाईन लावायचे असेल तर अगोदर अंमलबजावणी कधी करता ते सांगा. मायबाप समाज तुम्ही सरकारला धारेवर धरा. मी एकटा मुंबईत जाऊन बसेन. अंमलबजावणी झाल्याशिवाय उठणार नाही. सरकारने त्वरित निर्णय घ्यावा. अंत पाहू नका. मी जर मेलो तर मला तसेच शासनाच्या दारात नेऊन टाका,’’ असे मनोज जरांगे यांनी बुधवारी (ता. १४) अंतरवाली सराटी येथे उपस्थित मोठ्या जनसमुदायाला सांगितले. यावेळी जरांगे यांनी त्यांना लावलेली सलाईन काढून फेकून दिली.

राजपत्रित अध्यादेश व मसुदा यांची अंमलबजावणी करावी, अधिवेशन घेऊन ‘सगेसोयऱ्या’बाबत कायदा मंजूर करावा, यासाठी शनिवारपासून (ता.१०) मनोज जरांगे अंतरवाली सराटी येथे बेमुदत उपोषण करत आहेत.

रायगडावरून होणार घोषणा; अधिवेशन २० ला

मराठा समाजाच्या विविध मागण्यांसंदर्भात चर्चा करण्यासाठी २० फेब्रुवारी रोजी विधिमंडळाचे एकदिवसीय विशेष अधिवेशन बोलाविण्यास राज्य मंत्रिमंडळ बैठकीत आज मान्यता देण्यात आली. बैठकीच्या अध्यक्षस्थानी मुख्यमंत्री एकनाथ शिंदे होते. शिवजयंतीच्या मुहूर्तावर विशेष अधिवेशन घेऊन मराठा आरक्षणाची घोषणा करण्यास मुख्यमंत्री आग्रही होते.

मात्र शिवजयंतीला मतदारसंघांमध्ये नियोजित कार्यक्रम असल्याने अधिवेशनासाठी मुंबईत थांबणे गैरसोयीचे होईल, असा सूर बैठकीत लावण्यात आला. त्यामुळे शिवजयंतीला रायगडावरील कार्यक्रमात मराठा आरक्षणाची घोषणा करून दुसऱ्या दिवशी विशेष अधिवेशन घेतले जाणार आहे.