वडीगोद्री, (जि. जालना) : पोलिसांकडून विनाकारण आमच्या सहकाऱ्यांना त्रास दिला जात आहे. आंदोलन दडपण्याचा प्रयत्न यशस्वी होणार नाही, असे मराठा आरक्षण आंदोलनकर्ते मनोज जरांगे यांनी अंतरवाली सराटी येथे शनिवारी पत्रकार परिषदेत सांगितले. शुक्रवारी जरांगे यांना अशक्तपणा, अपचनाचा त्रास झाल्याने त्यांच्या छातीत दुखत होते. त्यानंतर छत्रपती संभाजीनगर येथील खासगी डॉ. चावरे, वडीगोद्री येथील डॉ. राजेंद्र तारख व सहकाऱ्यांनी अंतरवालीत त्यांच्यावर वैद्यकीय उपचार केले. त्यांची तब्येत सध्या स्थिर आहे.

शनिवारी जरांगे म्हणाले, आमच्यावर अन्याय करण्यासाठी गृहमंत्री देवेंद्र फडणवीस यांनी एसआयटी नेमली आहे. आम्ही काही न करता आमच्यामागे एसआयटी लावत असाल, तर आत्महत्या केलेल्या मराठाबांधवांचे कुटुंबीय सरकारविरोधात ‘३०२’चे खटले दाखल करतील. फडणवीस यांनी पोलिसांच्या माध्यमातून पोरांचा छळ सुरू केला आहे. जालन्याच्या एसपींच्या माध्यमातून जाणीवपूर्वक लोकांना बोलावून त्यांच्यावर दहशत निर्माण केली जात आहे. हे प्रकार न थांबल्यास प्रत्येक पोलिस स्टेशनमध्ये संपूर्ण तालुका जाऊन जाब विचारेल, असा इशारा जरांगे यांनी दिला.

भुजबळांसोबत समेट नाहीच

गुणरत्न सदावर्ते हे देवेंद्र फडणवीस यांचे खास आहेत. फडणवीस यांच्या सांगण्यावरूनच त्यांनी मराठा आरक्षणाविरोधात उच्च न्यायालयात याचिका दाखल केली आहे, असा आरोपही जरांगे यांनी केला. निवडणूक झाल्यावर आरक्षण उडविण्याचा यांचा डाव आहे. मंत्री छगन भुजबळ यांच्यासोबत कधीच समेट होणार नाही, असेही जरांगे यांनी यावेळी स्पष्ट केले.

निवडणूक लढवणार नाही

जालना किंवा बीडमधून आपण लोकसभा निवडणूक लढविणार नाही. माझा राजकारण हा मार्ग नाही. मी समाजाचा आदर करतो. मी निवडणूक लढविणार नाही, अशी भूमिका जरांगे यांनी स्पष्ट केली. गृहमंत्री फोन टॅप करत आहेत. मी कुठेही यायला तयार आहे. माझी नार्को टेस्ट करा, एसआयटी चौकशी लावली आहे. त्याला समाज उत्तर देईल. त्यांनी मला अटक करून दाखवावी. मग समजेल आंदोलनाचा टेंपो कमी झाला की वाढला, असा इशाराही जरांगे यांनी दिला.