जालना : जालना जिल्ह्यातील आंतरवाली सराटी येथील मराठा आरक्षणाच्या मुद्द्यावरून चालू असलेल्या आंदोलनाला हिंसक वळण लागले असून काल पोलिसांनी आंदोलकांवर लाठी चार्ज आणि गोळीबार केला आहे. त्यानंतर आंदोलकांनी पोलिसांवर दगडफेक करून गाड्या जाळल्या, बसही जाळल्या.

आंदोलकांनी केलेल्या लाठीहल्ल्यात आणि गोळीबारात अनेक आंदोलक जखमी झाले असून आज शरद पवार, उदयनराजे भोसले, संभाजीराजे छत्रपती या नेत्यांनी आंदोलकांची भेट घेतली. यावेळी रूग्णालयात दाखल असलेल्या आंदोलकांनी घटनास्थळी काय झालं याची आपबिती पवारांसमोर मांडली आहे.

"माझ्या डोक्याला लागलं आहे. पूर्ण प्लॅनिंग करून आमच्यावर हल्ला केला आहे. मला तर माझ्या मुस्लीम मित्राने उचलून नेलं, माझ्या बायकोला कुणी उचलून नेलं माहिती नाही. श्रावण महिना सुरू आहे, आम्ही माळकरी माणसं आहोत, मला उपवास आहे. आमच्यावर हल्ला करण्यासाठी बाराशे एसआरपी आणि २०० पोलिस असतील." अशा शब्दांत जखमी झालेल्या आंदोलकाने शरद पवार यांना आपबिती सांगितली.

"काल जालना जिल्ह्यातील अंतरवाली सराटी येथे मराठा आरक्षणासाठी लोकशाही मार्गाने आंदोलन करणाऱ्या आंदोलनकर्त्यांवर पोलिसांनी केलेल्या अमानुष लाठीहल्ल्यात जखमी झालेल्यांची उपजिल्हा रुग्णालय अंबड येथे आदरणीय श्री. शरदचंद्र पवार साहेब यांच्यासह जाऊन भेट घेतली. त्यांच्या तब्येतीची विचारपूस करून आधार दिला." असं ट्वीट जयंत पाटलांनी केलं आहे.

दरम्यान, या आंदोलनाला हिंसक वळण लागलं असून यांतर महाराष्ट्रातील अनेक ठिकाणी बंद पुकारला गेला आहे. या प्रकरणाचे पडसाद अनेक ठिकाणी उमटले असून रास्ता रोको आणि हल्ल्याच्या निषेधार्थ गाव बंद ठेवण्याचे निर्णय गावांनी घेतले आहेत.