उमरगा - मराठवाड्यातील मराठा समाजाला हैद्राबाद गॅझेट स्वीकारून स्वतंत्र मराठा कुणबी आरक्षण देण्यात यावे या मागणीसाठी सामाजिक कार्यकर्ते विनायकराव यांच्यासह एक हजार मराठा उमेदवार पंतप्रधान नरेंद्र मोदी यांच्या वाराणशी लोकसभा मतदार संघातून उमेदवारी अर्ज दाखल करण्याचा निर्धार केल्याची माहिती विनायकराव पाटील यांनी रविवारी (ता.१०) आयोजित पत्रकार परिषदेत दिली.

हैद्राबाद स्टेट स्टेट जनगणेत मराठवाड्यातील मराठा जातीची नोंद कुणबी मराठा होती. १९०९ मध्ये हैद्राबाद गॅझेट मध्ये मराठा जातीची कुणबी अशी नोंद आहे. काकासाहेब कालेलकर आयोगाने हैद्राबाद गॅझेट मध्ये मराठवाड्यातील मराठा समाजाचा इतर मागासवर्गीयात समावेश केला आहे.

नागपूर करारानुसार मराठवाड्यातील मराठा समाजाचा अनुशेष भरून काढण्याचे निर्देश दिले आहेत. आयोगाच्या शिफारशीनुसार १ मे १९६० रोजी मराठवाडा संयुक्त महाराष्ट्राच्या निर्मिती मध्ये विनाअट सामील झाला. राज्यघटनेच्या ३७१ कलमानुसार मराठवाड्यातील संपूर्ण जातीचा ओबीसी मध्ये समावेश करून कायदा करून हैद्राबाद गॅझेट स्वीकारण्याचे नमूद करण्यात आले आहे.

या सर्व मागण्या ११ व १२ मार्च रोजी होणाऱ्या मंत्रीमंडळाच्या बैठकीत मंजूर करण्यात याव्यात अशी मागणी पाटील यांनी मुख्यमंत्र्यांना  निवेदनाद्वारे केल्याची माहिती श्री. पाटील यांनी दिली.

दशमेश घाटावर उपोषणाचा इशारा

केंद्र व राज्य सरकारने घटनेच्या ३७१ कलमानुसार निजाम राजवटीतील ओबीसी असलेल्या मराठवाड्यातील मराठा समाजाचा ओबीसी प्रवर्गात समावेश करावा अन्यथा मराठवाड्यातील मराठा समाजाच्या वतीने देशाचे पंतप्रधान नरेंद्र मोदी यांच्या वाराणसी मतदार संघात मराठा आरक्षणा करिता बलिदान दिलेल्या तरुणांचे अस्थि विसर्जन गंगा किनारी दशमेश घाटावर करण्यात येणार आहे. यानंतर आपण स्वतः गंगाजल घेऊन अमरण उपोषण करणार असल्याचे श्री. पाटील यांनी सांगितले.