औरंगाबाद : सिटीकेअर हॉस्पिटलला गुरूवारी (ता. 23) एक रुग्ण ब्रेनहॅमरेज झाल्याने दाखल करण्यात आला होता. त्यांच्या कुटुंबीयांनी अवयवदानाची संमती दिल्याने शुक्रवारी (ता. 24) बारा वाजता अवयव ऑर्गन रिट्रायव्हल सेंटर कमल नयन बजाज हॉस्पिटलमध्ये दाखल करण्यात आले. त्यानंतर त्या रूग्णाला ब्रेनडेड घोषित करून शुक्रवारी रात्री उशिरापर्यंत कायदेशीर प्रक्रिया पार पडल्या. शनिवारी (ता. 25) सकाळी किडनी व डोळे बजाज हॉस्पिटल, यकृत एमजीएम रूग्णालयात प्रत्यारोपणासाठी पाठविण्यात आले. अवयवदानाच्या संमतीत नातेवाईकांचा होकार देण्यास उशीर झाल्याने हृदय प्रत्यारोपण होऊ शकले नाही, अशी माहिती विभागीय अवयव प्रत्यारोपण समितीचे समन्वयक मनोज गाडेकर यांनी दिली 

आतापर्यंत यकृत हे मुंबईला प्रत्यारोपणासाठी पाठवण्यात येत होते. मात्र लिव्हर ट्रान्सप्लांट ची मान्यता एमजीएमला मिळाल्याने यावेळी यकृत प्रत्यारोपणाची शस्त्रक्रिया एमजीएम रूग्णालयात सुरू आहे. यासाठी मुंबईच्या ग्लोबल हॉस्पटलची टीम शहरात दाखल झाली आहे. या अवयवदानामुळे मराठवाड्यातील पहिली यकृत प्रत्यारोपणाची शस्त्रक्रिया तर मराठवाड्यातील हे पंधरावे तर औरंगाबादेतील बारावे अवयव प्रत्यारोपण ठरले आहे.