औरंगाबाद - केंद्र शासनाच्या पथकामार्फत करण्यात येणारे स्वच्छ सर्वेक्षण अखेर लांबणीवर पडले आहे. शहराची कचराकोंडी झाल्याने सर्वेक्षण लांबणीवर टाकण्यात यावे, अशी मागणी महापालिकेने राज्य शासनाकडे केली होती. त्यानुसार आता केंद्राचे पथक पाच मार्चला शहरात येणार आहे. 

केंद्र शासनामार्फत स्वच्छ भारत मिशनअंतर्गत देशभरातील चार हजार ४१ शहरांचे स्वच्छ सर्वेक्षण करण्यात येत आहे. पहिल्या टप्प्यात जानेवारीत बहुतांश शहरांमध्ये केंद्र शासनाच्या पथकामार्फत सर्वेक्षण करण्यात आले; मात्र औरंगाबादचा दुसऱ्या टप्प्यामध्ये समावेश करण्यात आला होता. त्यानुसार सोमवारी (ता. २६) हे पथक शहरात येणार होते; परंतु नारेगाव (मांडकी) येथील कचरा डेपोच्या विरोधात पंचक्रोशीतील नागरिकांनी आंदोलन सुरू केल्यामुळे शहरात कचराकोंडी निर्माण झाली आहे. गेल्या अकरा दिवसांत कचराकोंडी फुटली नसल्याने शहरात मोठ्या प्रमाणात कचरा साचला आहे. नेमक्‍या याच वेळी केंद्राचे पथक दाखल होणार असल्याने महापालिकेचे टेन्शन वाढले होते.

दरम्यान, महापालिका प्रशासनाने राज्य शासनाला शहरात निर्माण झालेल्या कचराकोंडीची माहिती दिली. कचऱ्याचा प्रश्‍न सोडविण्यासाठी एक आठवड्याचा कालावधी लागणार असल्याने पाहणी दौरा पुढे ढकलण्यात यावा, अशी विनंती करण्यात आली होती. ती मान्य करण्यात आली असून, आता येत्या पाच मार्चपासून पथक औरंगाबाद शहरात येणार असल्याचे अतिरिक्त आयुक्त श्रीकृष्ण भालसिंग यांनी सांगितले.

असे मिळणार गुण 
स्वच्छता, घनकचरा व्यवस्थापन, कचरा प्रक्रिया प्रकल्प, लोकसहभाग, अस्वच्छतेच्या तक्रारींचा निपटारा यांसह इतर निकषांवर हे सर्वेक्षण होऊन गुणांकन ठरणार आहे. यंदा ही स्पर्धा चार हजार गुणांची आहे. यातील एक हजार गुण हे कागदोपत्री अहवालास आहेत. अठराशे गुण हे लोकसहभाग आणि तक्रार निवारणाला आहेत. उर्वरित बाराशे गुण हे प्रत्यक्ष पाहणीला आहेत. दीडशे गुण हे स्वच्छता ॲप डाऊनलोड करून त्याचा वापर करण्यासाठी आहेत.