अहमदपूर : तालुक्यातील थोरलेवाडी पाटी जवळ गुरूवारी ( ता.27) मोटरसायकल व स्विफ्ट डिझायर कार अपघातात दोन युवक ठार झाल्याची घटना घडली आहे.(Marathwada Accident News)

शिरूर ताजबंद येथील उत्तम उर्फ मेघवर्धन ज्ञानोबा डोंगरे ( 25 वर्ष) व राजेंद्र रामेश्वर चव्हाण ( 24 वर्ष) दोघे दुपारी एक वाजता शाईन कंपनीची दुचाकी( एम.एच.24 बी.एच.8280) वाहन घेऊन कांही खाजगी कामानिमित्त अहमदपूर कडे निघाले होते. अहमदपूर ते शिरूर रस्त्यावर सहा किलोमिटर अंतरावर असलेल्या थोरलेवाडी पाटीजवळ समोरून येणा-या स्विफ्ट डिझायर कंपनीच्या चारचाकी( एम.एच.24 ए.डब्लू 5369) वहान व वरील युवकांची मोटारसायकल यांच्यात समोरासमोर धडक होऊन मेघवर्धन डोंगरे व राजेंद्र चव्हाण या दोन्ही युवकांचा जाग्यावर मृत्यू झाला.

काल आजी व आज नाताचा मृत्यूने डोंगरे कुटुंबावर दुःखाचा डोंगर.

पदवीधर असलेले अपघातातील मयत मेघवर्धन डोंगरे पुणे येथे कंपनीत नोकरी करीत होते.बुधवारी ( ता.26) आपली आजी वारल्याने ते अंतविधीसाठी शिरूर ताजबंद येथे आले होते.

नांदेड-लातूर राष्ट्रीय महामार्ग क्रमांक 361 या काँक्रीट रस्त्याचे काम चालू आहे.अहमदपूर ते शिरूर ताजबंद या दहा किलोमीटर अंतरवरील काॅक्रेटचा कांही रस्ता वाहतूकीसाठी खुला केला असून या रस्त्यावर वहाने अधिक गतीने चालवली जात असल्याने अपघाताची शक्यता वाढली आहे.