Sambhajinagar Crime: कापूस खरेदी- विक्रीच्या व्यवहारात व्यापाऱ्याची १२ कोटी ६४ लाख रुपयांची फसवणूक करण्यात आली. एप्रिल २०१८ ते सप्टेंबर २०२४ या कालावधीत एमआयडीसी चिकलठाणा भागात हा प्रकार घडला. याप्रकरणी मुंबईच्या दोन आरोपींविरुद्ध सिडको एमआयडीसी पोलिस ठाण्यात गुन्हा दाखल करण्यात आला आहे.

श्याम त्रिलोकचंद अग्रवाल (वय ४५ रा. चिकलठाणा एमआयडीसी) यांनी तक्रार दाखल केली. त्यांचा कापसाच्या गाठी खरेदी-विक्रीचा व्यवसाय आहे. चिराग विनोदकुमार पित्ती आणि प्रवीण शेली (दोघे रा. मुंबई) यांनी अग्रवाल यांच्याकडून कापसाच्या गाठीचा माल विकत घेतला होता. या गाठीच्या खरेदीची रक्कम त्यांनी दिली नाही.

तसेच अग्रवाल यांचा राजस्थान झालावाड येथे ठेवलेला कापसाचा धागादेखील त्यांनी परस्पर विक्री करीत त्याची रक्कम स्वतःकडे ठेवून घेतली. अग्रवाल यांनी एकूण १२ कोटी ६४ लाख ५३ हजार रुपयांची रक्कम मागितली असता आरोपींनी 'तुमची कोणतीही रक्कम आमच्याकडे बाकी नाही', असे सांगितले. तसेच ही रक्कम हडपण्यासाठी बनावट लेजर बुक तयार केले. फिर्यादीवरून, दोन्ही संशयित आरोपींवर गुन्हा दाखल करण्यात आला असून आर्थिक गुन्हे शाखा तपास करीत आहे.