जळकोट, (जि.लातूर): तालुक्यात खरिपातील सर्व पिके निघाली असून राने उजाड झाली आहेत. काही शेतकरी ट्रॅक्टरच्या सहाय्याने नांगरटी करणेही सुरु असून उन्हाळ्यापूर्वीच पाझर तलावही आटू लागले असून जनावरांच्या पाण्यासाठी भटकंती सुरु असल्याने सात-आठ महिने कसे काढायचे? हा प्रश्न शेतकऱ्यांसमोर आहे.

खरीपातील तूर निघाल्यानंतर शिवारात सर्व राने उजाड होत आहेत. तुरीचे अत्यल्प उत्पन्न निघाले असून खर्चही निघाला नसल्याने शेतकरी अडचणीत सापडला आहे. शिवारात उन्हाळी रानाच्या मशागतीला सुरवात झाली आहे. शिवारातील राने उजाड झाली असून मजूर भाकरीचा चंद्र शोधण्यासाठी शहराकडे जात आहेत.

शेतकरी दहशतीत! हिंस्र प्राण्याचा पुन्हा हल्ला, बचावलेल्या पाच शेळ्याही वाचल्या...

ट्रॅक्टरच्या सहाय्याने नांगरटी
उजाड झालेल्या शिवारात अनेक शेतकरी रानाच्या मशागत कामाला लागले आहेत. ट्रॅक्टरच्या सहाय्याने नांगरटी करण्याच्या कामाला लागले आहेत. नांगरटी केल्यानंतर उन्हाने रान तळून पेरणीयोग्य होते म्हणून या कामाला अनेकजण लागले असल्याचे चित्र आहे.

सात-आठ महिने कसे काढणार?
येणारे पावसाळ्यापर्यंतचे सात- आठ महिने कसे काढायचे हा प्रश्न शेतकर्यासमोर आ वासून उभा आहे. जनावरांच्या चारा-पाण्याचा  प्रश्न आहे. पाझर तलाव आटल्याने शिवारात मुबलक पाणी नसल्याने  पिण्याच्या पाण्यासाठी कोसो दूर भटकंती सुरु असल्याचे चित्र असून एप्रिल मे महिन्यात हा प्रश्न अधिक गंभीर बनणार असल्याने शेतकरी चिंतेत आहेत.

ग्रामीणच्या घटनेमुळे शहर पोलीस निरीक्षकाची बदली? उदगीरात जोरदार चर्चा

राने उजाड
जनावरांना उजाड रानावरील पालापाचोळा खाऊ घालत दिवस ढकलण्याचे काम शेतकरी करत असल्याचे चित्र आहे. तर भाकड जनावरांना कवडीमोल किमतीत बाजारात नेऊन विकावे लागत आहे. बैलबाजारात जनावरांचे भाव कमी झाल्याचे पशुपालक सांगत आहेत. पाऊस वेळेवर आला तरी नवा चारा येण्यासाठी जुलै-आॅगष्ट महिन्याची वाट पहावी लागणार असल्याने येणारे महिने कसे काढायचे? हा प्रश्न आहे.सद्यस्थितीत उन्हाळ्यापूर्वीच पाझर तलाव आटत असून विहिरींही तळ गाठत आहेत.  जनावरांचे चारा-पाणी करत संगोपन करत रानाच्या मशागतीची धडपड करताना शेतकरी दिसत आहेत.

(edited by- pramod sarawale)