वैजापूर - मराठवाड्यातील पाणी प्रश्न चिघळण्याची शक्यता असून वैजापूर येथील पाटबंधारे कार्यालयासमोर उपोषणाला बसलेल्या १०२ गावातील शेतकऱ्यांनी शनिवारी जलसमाधीचा इशारा दिला होता. जलसमाधी घेण्यासाठी निघालेल्या शेकडो शेतकऱ्यांना पोलिसांनी गवंडगाव येथील टोलनाक्यावर अडवले. यानंतर काही काळासाठी परिस्थिती तणावपूर्ण झाली होती. या सर्व शेतकऱ्यांना येवला तालुका पोलीस ठाण्यात नेण्यात आले.

नगर आणि निफाड तालुक्यातील गावासाठी नाशिक जिल्ह्यातील दारणा, भावली, मुकणे आणि भाम धरणातून नांदूर मधमेश्वर धरणात पाण्याचे आवर्तन सोडण्यात आले होते. या पाण्यातून आम्हालाही पाण्याचे आवर्तन मिळावे, अशी छत्रपती संभाजीनगर जिल्ह्यातील वैजापूर येथील शेतकऱ्यांची मागणी आहे.

उन्हाळी आवर्तनाची मागणी करूनही पाणी न सोडल्याने दोनशेहून अधिक शेतकऱ्यांनी आंदोलनाचा पवित्रा घेतला होता.

3 मेपासून वैजापूर येथील पाटबंधारे कार्यालयाच्या समोर वैजापूर तालुक्यातील व गंगापूर तालुक्यातील एकूण 102 गावातील शेतकरी उपोषणासाठी बसले होते. 11 टीएमसी पाणी आरक्षित असून सुद्धा नांदूर मधमेश्वर पाटबंधारे विभागाकडून पाणी सोडण्यात न आल्यामुळे हे उपोषण सुरू होते.

शनिवारी उपोषण करणाऱ्या शेतकऱ्यांनी जलसमाधीचा इशारा दिला होता. जलसमाधी घेण्यासाठी निघालेल्या या शेतकऱ्यांना पोलिसांनी गवंडगाव येथील टोल नाक्यावर अडवले. यामुळे काही काळ तणाव निर्माण झाला. आंदोलक शेतकऱ्यांना येवला तालुका पोलीस ठाण्यात नेण्यात आले.

शेतकऱ्यांना दिला पोलिसांना चकवा

काही आंदोलक शेतकरी पोलिसांना चकवा देत निफाड तालुक्यातील मधमेश्वर पीक अपवेअर धरणापर्यंत पोहोचले होते. धरणात उतरून जलसमाधी घेण्याचा इशारा या शेतकऱ्यांनी दिला आहे. जोपर्यंत पाणी सोडण्याचा लेखी आदेश प्राप्त होत नाही, तोवर आंदोलन सुरूच ठेवू असा इशाराच आंदोलकांनी दिला आहे.