जळकोट : दसरा- दिवाळी सण तोंडावर आले असताना त्यासाठी लागणाऱ्या झेंडूच्या फुलाची लागवड करत उमरदरा (ता. जळकोट) येथील एका तरुण शेतकऱ्याने सणासाठी आधार निर्माण केला आहे.

यावर्षी सुरवातीला जास्त पाऊस व मध्यंतरी पंचवीस दिवस पाऊस नसल्यामुळे खरिपातील पिके अडचणीत सापडली. परंतु झेंडु फुलांची लागवड करत यातून आर्थिक आधार निर्माण केला आहे.

दसरा-दिवाळी सणाला झेंडु फुलांना मोठी मागणी असते. कारण पूजा-अभिषेक तसेच दुकानदारांचे लक्ष्मीपूजन असते. त्यासाठी मोठ्या प्रमाणावर फुलांची मागणी असते. त्यादृष्टीने काही शेतकर्यांनी आपल्या शेतात हा प्रयोग केला आहे. भाव चांगला लागला तर दिवाळी सणासाठी या शेतकर्यांना आर्थिक आधार मिळणार आहे. बाजारपेठत भाव किती मिळेल? हे आताच सांगणे कठीण आहे.

उमरदरा (ता.जळकोट) येथील तरुण शेतकरी परमेश्वर बालाजी जोगपेटे यांनी आपल्या शेतात अर्धा एकर क्षेत्रावर इंडस अष्टगंधा झेंडू फुलांची लागवड केली असून लातूरच्या एका नर्सरीमधून रोपटे आणले. विहिरीचे पाणी देत दोन वेळेस खत व चार फवारण्या केल्या असून दसरा सणाला तोडणी सुरु होणार आहे. या सणाला चार ते पाच क्विंटल फुले निघतील परंतु दिवाळीला मात्र १५ ते २० क्विंटल फुल उत्पादन अपेक्षित आहे. यातून भाव चांगला लागला तर सव्वा ते दीड लाख रूपयांचे उत्पन्न अपेक्षित असल्याचे शेतकरी परमेश्वर जोगपेटे यांनी सांगितले. परिसरातील बाजारपेठात त्याची विक्री केली जाणार आहे.

श्री जोगपेटे यांनी सांगितले की, अष्टगंधा झेंडुचे तीन हजार रोपटे आणून त्याची लागवड अशा वेळी केली की ते बरोबर दसरा दिवाळीला तोडणी व्हावी. असा उद्देश होता.