मानवत ः कोरोनामुक्त झालेल्या एका चौदा वर्षीय मुलीला मयत दाखवण्याच्या प्रताप जिल्हा रुग्णालयाने केला आहे. गुरुवारी रात्री जिल्हा प्रशासनाने प्रसिध्द केलेल्या प्रेसनोटमध्ये मानवत भागातील गौड गल्ली येथील एक १४ वर्षीय मुलगी मयत झाल्याची माहिती प्रशासनाने दिली होती. यानंतर सर्वत्र वृत्त प्रकाशित झाल्यावर सदर मुलीच्या कुटूंबाला या प्रकरणाचा प्रचंड मनस्ताप सहन करावा लागला. 

शहरातील गोदु गल्ली येथील चौदा वर्षीय मुलगी काही दिवसांपूर्वी कोरोना बाधित आढळली होती. तिच्यावर परभणी येथील खाजगी रुग्णालयात उपचार करण्यात आले. कोरोनामुक्त झाल्यानंतर सदर मुलीची सुट्टी झाली. याबाबत खासगी रुग्णालयाने जिल्हा रुग्णालयाला माहिती कळवली. परंतू, गुरुवारी (ता.१३) रात्री उशिरा काढलेल्या प्रेसनोटमध्ये मानवत शहरातील गौड गल्ली येथील चौदा वर्षीय मुलगी मयत असल्याचे दाखवण्यात आले. या प्रकरणाची शहरात चर्चा सुरु झाली. संबंधित प्रेसनोट सोशल मिडियावर मोठ्या प्रमाणात व्हायरल झाली. 

हेही वाचा - धक्कादायक ! वीजेच्या धक्क्याने बाप-लेकाचा मृत्यू

मुलीच्या कुटुंबाला मानसिक त्रास 
मानवत शहरात गौड गल्ली अस्तित्वातच नसल्याने गोंधळ निर्माण झाला. काही दिवसांपुर्वी गोदु गल्लीतील एक चौदा वर्षीय मुलगी कोरोनाबाधित आढळली होती. सदर मुलीच्या कुटुंबाने गावातील नातेवाईकांना व मित्रांना बोलावून सदर प्रकरणाची शहानिशा करण्याचा प्रयत्न केला असता गोदु गल्ली ऐवजी गौड गल्ली असा चुकीचा उल्लेख करून आपल्या जिवंत मुलीलाच मयत दाखवल्याचे समजल्यानंतर त्यांना धक्काच बसला. याप्रकारे मुलीच्या कुटुंबाला प्रचंड मानसिक त्रास सहन करावा लागत आहे. 

हेही वाचा - शैक्षणिक संस्थांनी शुल्क वाढ केल्यास होणार कारवाई, शिक्षणमंत्र्यांचा सज्जड दम...

यापूर्वी देखील घडली होती अशीच चुक 
यापूर्वी देखील शहरातील पंधरा दिवसापूर्वी मयत झालेल्या दोघांना दोन दिवसापूर्वी परत एकदा मयताच्या यादीत दाखवल्याने शहरात भीतीचे वातावरण निर्माण झाले होते. मेनरोड येथील एक पुरुष व राठोड गल्ली येथील एक पुरुष पंधरा दिवसांपूर्वीच मयत झाले होते. परंतू, जिल्हा रुग्णालयाने काढलेल्या प्रेसनोटमध्ये या मयताचा उल्लेख केल्याने भीतीचे वातावरण निर्माण झाले होते. 

 
संपादन ः राजन मंगरुळकर