नांदेड : ॲटोत प्रवास करणाऱ्या एका युवतीला तीने सांगितलेल्या ठिकाणी न नेता दुसऱ्याच ठिकाणी नेऊन ॲटो चालकाने विनयभंग केला. यावेळी सतर्कता बाळगत तीने आपल्या आईला बोलावून घेतले मात्र तिच्या आईलाही त्यांने धक्काबूक्की केली. यानंतर मात्र जमावाने त्याला चांगलाच चोपला. ही घटना मंगळवारी (ता. तीन) दुपारी तीनच्या सुमारास गुरूजी चौक, पूर्णा रोड येथे घडली.

शहराच्या विशालनगर भागात राहणारी एक युवती छत्रपती चौक येथून विशालनगर येथे जाण्यासाठी ॲटोत बसली. मात्र ॲटोचालक श्रीकांत बाबूराव सोनकांबळे याने तीन सांगितलेल्या ठिकाणी ॲटो न नेता रस्त्यात वळवून गुरूजी चौकात नेला. तिथे गेल्यानंतर त्याने तिचा अश्‍लिल भाषेत बोलून विनयभंग केला. परंतु पीडीत युवतीने आपल्या आईला फोनवरून संपर्क साधला. यावेळी आईने धावाधाव करत गुरूजी चौक गाठले. 

तिच्या आईलाही धक्काबुक्की, जमावाकडून चोप

यावेळी ॲटोचालक श्रीकांतने तिच्या आईलाही धक्काबुक्की केली. यानंतर मात्र तिथे जमा झालेल्या जमावाने ॲटोचालकास चांगलाच चोप देत भाग्यनगर पोलिसांंच्या स्वाधीन केले. पिडीत युवतीच्या तक्रारीवरुन पोलिसांनी अपहरण, विनयभंग व शिवीगाळ केल्याप्रकरणी श्रीकांत सोनकांबळेविरुद्ध गुन्हा दाखल केला. तपास फौजदार एस. के. नरवाडे करत आहेत. 

हेही वाचा - जिल्हा न्यायालयाच्या नविन इमारतीसाठी दिडशे कोटी

गळफास घेऊन एकाचा मृत्यू 

नांदेड : रागाच्या भरात एकाने सागाच्या झाडाला गळफसा घेऊन आत्‍महत्या केली. ही घटना शेळगाव थडी (ता. बिलोली) शिवारात मंगळवारी (ता. तीन) सायंकाळी सहा वाजताच्या सुमारास घडली. 

पोलिस सुत्रांनी दिलेली माहिती अशी की, शेळगाव थडी (ता. बिलोली) शिवारात सागाच्या झाडाला गळफास घेतलेला मृतदेह असल्याची माहिती मिळाली. यावरून कुंडलवाडी पोलिस ठाण्याचे सहाय्यक फौजदार श्री. इंगळे हे आपल्या सहकाऱ्यासह घटनास्थळी गेले. पंचानामा केल्यानंतर मयत विठ्ठल बाबूराव इजूलकुंटे हा बेळकोणी बु. (ता. बिलोली) येथील रहिवाशी असल्याचे समजले. त्याच्या नातेवाईकांना माहिती देऊन उत्तरीय तपासणीसाठी मृतदेह बिलोलीच्या सरकारी रुग्णालयात दाखल केला. बाबूराव इजुलकुंटे यांच्या माहितीवरून कुंडलवाडी पोलिस ठाण्यात आकस्मिक मृत्यूची नोंद करण्यात आली आहे. आत्महत्येचे कारण अद्याप समजले नसल्याचे पोलिसांनी सांगितले.