जालना : महाराष्ट्र लोकसेवा आयोगाच्या (एमपीएससी) (MPSC) परीक्षेची तयारी करणाऱ्या विद्यार्थ्याचा हृदयविकाराच्या झटक्याने (Heart Attack) निधन झाले आहे. मृताचे अशोक सोनाजी घुले (वय ३०, रा.आंबा) असे मृत विद्यार्थ्याचे नाव आहे. ही घटना जालना (Jalna) जिल्ह्यातील आंबा येथे बुधवारी (ता.चार) दुपारी चार वाजेच्या सुमारास घडली आहे. अशोकचे पोलिस उपनिरीक्षक (पीएसआय) (Police Sub Inspector) व्हायचे स्वप्न होते. मात्र हे स्वप्न त्याचे वास्तवात येण्यापूर्वीचे तो जग सोडून निघून गेला आहे. आंबाचे सोनाजी घुले यांना दोन मुले आणि एक मुलगी आहे. त्यांना शेत आहे. दोन मुलांपैकी अशोक हा गेल्या काही वर्षांपासून औरंगाबाद येथे एमपीएससीच्या परीक्षेची तयारी करत होता.

काही दिवसांवर परीक्षा आली होती. मात्र गेल्या वर्षी प्रमाणे या वर्षीही परीक्षा रद्द होईल का? याची चिंता अशोकला लागली होती. तो काही दिवसांपूर्वीच आंबा या आपल्या गावी आला होता. बुधवारी वडिलांना मदतीसाठी अशोक शेतात गेला होता. दुपारी त्याला छातीत वेदना होऊ लागल्या. तो एका झाडा खाली बसला असता त्याचा हृदयविकाराने मृत्यू झाला. त्याच्या मृत्यूने परिसरात हळहळ व्यक्त केला जात आहे.