घाटनांदूर (बीड): अंबाजोगाई येथील खोलेश्वर प्राथमिक शाळेजवळील कोठाड गल्लीत राहणारे फारुख लतीफ मोमीन (वय ४२) मागील दोन दिवसापासून बेपत्ता झाले होते. फारुख अब्दुल लतीफ मोमीन यांची धायगुडा पिंपळा दूरदर्शन केंद्राजवळ वीटभट्टी आहे. रविवारी (ता.२२) सायंकाळी ते मित्रासोबत जेवायला जात असल्याचे सांगून घराबाहेर पडले. त्यानंतर त्यांचा संपर्क न झाल्याने कुटुंबीयांनी त्यांचा शोध घेऊनही ते सापडले नव्हते. (ता.२३) मंगळवारी त्यांच्या मुलाने अंबाजोगाई शहर पोलीस ठाण्यात हरवल्याची तक्रार दाखल केली होती. मंगळवारी (दि.२४) दुपारी ४ वाजताच्या सुमारास त्यांचा मृतदेह अंबाजोगाई परळी रोडवर वरवटी-पिंपळा शिवारात पुलाजवळील लहूदास मुंडे यांच्या शेतात सापडला.

त्यानंतर बर्दापूर पोलिसांनी अतिशय वेगवान तपास करत अवघ्या २४ तासात या खुनाचा उलगडा केला. मयताच्या मुलगा नाजेश फारोक मोमीन याच्या फिर्यादीवरून (ता.२५) बुधवारी रात्री उशिरा मारुती उर्फ वाघ्या हनुमंत चाटे (रा. वरवटी, ता. अंबाजोगाई) व अज्ञात एका व्यक्तिविरुद्ध खुनाचा गुन्हा दाखल करण्यात आला. मारुती चाटे यास ताब्यात घेतले असून अटक करण्याची प्रक्रिया सुरू आहे.