लातूर : राज्यातील सर्वात मोठ्या मुरूड (ता. लातूर) ग्रामपंचायतीच्या सार्वत्रिक निवडणुकीत प्रचाराला वेग आला असतानाच बुधवारी (ता. १४) रात्री धक्कादायक घटना घडली. विरोधी पॅनेलचे प्रमुख विद्यमान ग्रामपंचायत सदस्य अमरबापू पुंडलिकराव नाडे (वय ४३) यांचा भाषणानंतर काही वेळात व्यासपीठावरच मृत्यू झाला. त्यांच्या पत्नी अमृता या निवडणुकीत सरपंच पदाच्या उमेदवार असून त्यांच्या व पॅनेलमधील उमेदवारांच्या प्रचारासाठी बुधवारी रात्री सार्वजनिक स्टेजवर प्रचार सभेचे आयोजन करण्यात आले होते.पॅनेलप्रमुख म्हणून नाडे यांनी भाषण केले व ते व्यासपीठावरील पत्नी अमृता यांच्या शेजारील खुर्चीत विराजमान झाले. त्यानंतर सदस्यपदाचे उमेदवार हणमंतबापू नागटिळक यांचे शेवटचे भाषण सुरू असतानाच काही वेळातच नाडे यांना घाम आला. ते दोनवेळा पाणी पिले व काही क्षणातच त्यांनी मान टाकली. अचानक घडलेल्या या घटनेमुळे सभेत धावपळ सुरू झाली.

सभा स्थगित करून नाडे यांना तातडीने येथील खासगी रूग्णालयात उपचारासाठी नेण्यात आले. तेथून लातूरला सर्वोपचार केंद्रात उपचारासाठी दाखल करण्यात आले. मात्र, त्यापूर्वीच नाडे यांचा मृत्यू झाला होता. या घटनेमुळे गावावर शोककळा पसरली. निवडणुकीत रविवारी (ता. १८) मतदान असताना या घटनेमुळे सर्वांनाच दुःख अनावर झाले. यामुळे सर्व तीनही पॅनेलने प्रचार थांबवत गावात ठिकठिकाणी लावलेले प्रचाराचे बॅनर व पोस्टर रातोरात काढून घेतले.

गुरूवारी (ता. १५) बाजारपेठ बंद ठेवण्यात आली असून शाळा व महाविदयालयही बंद ठेवण्यात आले आहे. (के.) नाडे यांनी गावात अष्टविनायक प्रतिष्ठानच्या माध्यमातून भरीव सामाजिक कार्य केले आहे. प्रतिष्ठानचे अष्टविनायक कनिष्ठ महाविद्यालय आहे. नाडे यांच्यावर गुरूवारी सकाळी त्यांच्या शेतात अंत्यसंस्कार होणार आहेत. त्यांच्या मागे पत्नी अमृता, एक मुलगा व एक मुलगी असा परिवार आहे.