परभणी ः कोरोना विषाणु संसर्गाचा प्रसार रोखण्यासाठी जिल्हाधिकाऱ्यांनी लागू केलेली संचारबंदी शहरात केवळ नावालाच दिसून आली. रस्त्यावर सर्रास लोक वावरतांना दिसत होते. कुणी गाड्या घेवून तर कुणी पायी जातांनाचे चित्र पहावयास मिळाले. व्यापाऱ्यांनी मात्र प्रशासनाच्या आदेशाचे पालन करुन त्यांची प्रतिष्ठाणे पूर्णत: बंद ठेवली होती.

परभणी जिल्ह्यात कोरोनाचा वाढता प्रसार रोखण्यासाठी व त्यास प्रतिबंध घालण्यायाठी जिल्हाधिकारी दीपक मुगळीकर यांनी शनिवार व रविवार या दोन दिवसाची संचारबंदी लागू केली आहे. या संचारबंदीचा मुळ उद्देश हा लोकांनी घराबाहेर पडू नये व एकत्र जमू नये हा होता. परंतू परभणी शहरात संचारबंदी केवळ नावालाच दिसत होती. मुख्य शहरासह बाह्य वस्त्यामध्ये लोकांचा मुक्त वावर दिसत होता. वसमत रस्ता, जिंतूर रस्ता, गंगाखेड रस्तयावरील कॉलन्यामध्येही लोक रस्त्यावर आलेले दिसत होते. मुख्य बाजारपेठेतही तुरळक गर्दी दिसत होती. सरकारी दवाखाना परिसरातही चांगलीच गर्दी दिसून येत होती. बसस्थानक, रेल्वेस्थानक परिसरातही लोकांचा वावर दिवसभर दिसून आला. संचारबंदीतून सुट असणाऱ्या अत्यावश्यक सेवांची दुकाने वगळता इतर उर्वरित दुकाने पूर्णपणे कडकडीत बंद होती. व्यापाऱ्यांनी प्रशासनाच्या आवाहनाला चांगला प्रतिसाद दिल्याचे दिसून आले.

हेही वाचा -  लोकांची फसवणुक करणारे तीन भामटे गजाआड; स्थानिक गुन्हे शाखा व पूर्णा पोलिसांची कामगिरी

वसमत रस्त्यावर शनिवारी (ता.13) सकाळी वर्तमान पत्राच्या पार्सलासाठी गेलेल्या पत्रकारांना नवामोंढा पोलिस ठाण्याच्या अधिकाऱ्यांकडून मारहाण झाली. त्यांना दवाखान्यात उपचारासाठी नेण्यात आले होते. काळी कमान परिसरात सकाळी लोकांची गर्दी जमली होती. त्यामुळे त्यांना पांगविण्यासाठी पोलिसांना कारवाई करावी लागली. परंतू पत्रकार असल्याचे सांगूनही नवामोंढा पोलिस ठाण्याच्या अधिकाऱ्यांनी त्यांना मारहाण केली.

आरटीपीसीआर केंद्र बंद
महापालिकेच्यावतीने शहरात चार ठिकाणी आरटीपीसीआर तपासणी केंद्र उभारण्यात आली होती. परंतू अचानक संचारबंदी लागू झाल्याने हे केंद्र बंद करण्यात आली. या केंद्रावर ना आरोग्य कर्मचारी होते ना महापालिकेचे कर्मचारी होते. जिल्हाधिकाऱ्यांच्या आदेशात लसीकरण व आरटीपीसीआर चाचणी सेवा सुरु ठेवण्याचे नमुद होते. परंतू हे चार ही केंद्र शनिवारी बंद होते.

संपादन- प्रल्हाद कांबळे