उस्मानाबाद: केंद्रीय मंत्री नारायण राणे यांना अटक केल्याच्या निषेधार्थ भारतीय जनता युवा मोर्चा कार्यकर्त्यांनी बुधवारी (ता. 25) जिल्हाधिकारी कार्यालयासमोर निदर्शने केली. यावेळी महाआघाडी शासनाचा निषेध करण्यात आला. यावेळी ठाकरे सरकार मुर्दाबाद अशा घोषणाही भाजप कार्यकर्त्यांनी दिल्या. पोलिसांनी बळाचा वापर करीत केंद्रीय मंत्री राणे यांना अटक केल्याचा आरोपही यावेळी भाजप पदाधिकाऱ्यांकडून करण्यात आला.

तसेच जिल्ह्याचे सेनेचे खासदार आणि आमदार यांना चित्रपटातील 'रंगा बिल्ला' यांची उपमा देत घोषणाबाजी केली. याशिवाय काल ट्विटर वॉरमुळे जिल्ह्यातील राजकीय वातावरण चांगलेच ढवळून निघाले आहे. यावेळी भाजपचे जिल्हाध्यक्ष नितीन काळे, सरचिटणीस नितीन भोसले, युवा मोर्चाचे जिल्हाध्यक्ष राजसिंह राजेनिंबाळकर, माजी जिल्हा परिषद सदस्य रामदास कोळगे, प्रदेश कार्यकारणी सदस्य सुधीर पाटील, विनोद कपाट यांसह अनेक कार्यकर्ते यावेळी मोठ्या प्रमाणात उपस्थित होते.