लातूर- नीट पेपरफुटी प्रकरणात मोठी अपडेट समोर आली आहे. लातूरमधून रविवारी दोन शिक्षकांना ताब्यात घेण्यात आले होते. या दोन्ही शिक्षकांवर गुन्हा दाखल करण्यात आला आहे. यासह इतर दोघांवर देखील लातूरच्या शिवाजीनगर पोलीस स्टेशनमध्ये गुन्हा दाखल करण्यात आला आहे. विशेष म्हणजे यातील एका शिक्षकाला अटक करण्यात आलीये, तर दुसरा शिक्षक फरार आहे.

शिक्षक धाराशिवमार्गे दिल्लीला पैसे पाठवत असल्याचं समोर आलं आहे. यात आतापर्यंत चार नावे समोर आली आहेत. यातील एक आरोपी हा दिल्लीचा असल्याची माहिती आहे. जलील पठाण याला अटक करण्यात आलीये, तर संजय जाधव हा फरार झाला आहे. त्याला पकडण्यासाठी पोलिसांनी वेगवेगळी पथके रवाना केली आहे. काल ताब्यात घेण्यात आलेला संजय जाधव आज फरार कसा झाला असा प्रश्न विचारला जात आहे.

नीट परीक्षेदरम्यान मोठा गैरप्रकार झाल्याचं समोर येत आहे. देशभरातील विविध राज्यात याप्रकरणी कारवाई केली जात आहे. पेपरफुटीचा तपास सीबीआयकडे सोपवण्यात आला आहे. असे असतानाचा पेपरफुटीचे राज्यातील लातूर कनेक्शन समोर आले आहे. यात लातूरमधील दोन शिक्षकांचा सहभाग असल्याचं समोर येत आहे. दोन्ही शिक्षक जिल्हा परिषदेचे शिक्षक आहेत, पीएचडी धारक आहेत आणि स्वत:चे कोचिंग क्लासेस देखील चालवतात.

दोन्ही शिक्षकांची पोलिसांनी रविवारी कसून चौकशी केली होती. त्यानंतर त्यांना सोडून देण्यात आले होते. पोलिसांनी सांगितले की, आरोपींच्या मोबाईलवर हॉलतिकिट आणि काही आर्थिक व्यवहार झाल्याचं दिसून आलंय. त्यानंतर त्यांना अटक करण्याची प्रक्रिया सुरु करण्यात आली. एकाला अटक झालीये, तिघांचा शोध सुरु आहे.

पोलिसांच्या माहितीनुसार, ४० ते ५० लाख रुपये देऊ शकतील अशा पालकांना संपर्क साधला जात होता. पैसे दिल्यास पेपर आधीच पुरवला जाईल. पालकांना ७२० पैकी ६५० गुण मिळवून देण्याची हमी दिली जायची.

आतापर्यंत बिहार, पंजाब, गुजरात आणि हरियाणा राज्यात राष्ट्रीय तपास यंत्रणा सक्रिय झाली आहे. आता महाराष्ट्रातही याचे धागे-दोरे सापडले आहेत. याप्रकरणी आणखी काही नावे समोर येऊ शकतात.