औरंगाबाद - कंत्राटी कर्मचाऱ्यांना मिळणाऱ्या सुविधादेखील महापालिकेतील सुमारे साडेआठशे कायम कर्मचाऱ्यांना मिळत नसल्याचे समोर आले आहे. या कर्मचाऱ्यांचा साधा पीएफही (प्रोव्हिडंट फंड) कापला जात नसल्याने या कर्मचाऱ्यांचे भवितव्य अंधारात सापडले आहे. 

महापालिकेत सध्या एक हजारापेक्षा जास्त कंत्राटी कर्मचारी काम करतात. त्यांच्या पीएफचे व ईएसआयसीचे पैसे भरले जातात; मात्र सुमारे साडेआठशे कर्मचाऱ्यांना हे लाभदेखील मिळत नसल्याचे समोर आले आहे. राज्य सरकारने जुनी पेन्शन योजना बंद करीत नवीन अंशदायी पेन्शन योजना लागू करण्याचा निर्णय घेतला आहे. त्यामुळे 2005 पूर्वी भरती झालेल्या
कर्मचाऱ्यांनाच जुनी पेन्शन योजना लागू आहे.

त्यानंतर भरती झालेल्या कर्मचाऱ्यांना अंशदायी पेन्शन योजना लागू करणे गरजेचे होते; मात्र, 2005 पासून भरती झालेल्या साडेआठशे कायम कर्मचाऱ्यांना अद्याप लाभ सुरू झालेला नाही. या कर्मचाऱ्यांच्या वेतनातून पीएफची रक्कमही कपात केली जात नाही. यासंदर्भात कर्मचाऱ्यांनी पाठपुरावा केल्यानंतर महापालिका आयुक्तांनी समिती नियुक्त केली. त्या समितीने अभ्यास करून आयुक्तांना अहवाल सादर केला.

आयुक्तांनी एक जानेवारी 2019 पासून या कर्मचाऱ्यांना अंशदायी पेन्शन योजना करण्याचे आदेश दिले; परंतु 2005 ते 2018 या कालावधीबाबत मात्र निर्णय घेतला नाही. 

घडून तर पाहा - औरंगाबाद : रुग्णांना घरपोच मोफत रिक्षा, या क्रमांकावर करा काॅल

इतर महापालिकांचा करणार अभ्यास 

राज्यातील इतर महापालिकांनी याबाबत काय केले याची माहिती घेण्याचे आदेश आयुक्तांनी दिले आहेत. त्यानुसार आता अधिकाऱ्यांची समिती माहिती घेत आहे; मात्र माहिती मिळण्यास विलंब होत असल्याने प्रश्‍न अद्याप प्रलंबित आहे.