नांदेड : विधानसभेच्या देगलूर मतदारसंघाची पोटनिवडणूक जाहीर झाली असून ३० ऑक्टोबरला मतदान होणार आहे. दोन नोव्हेंबरला मतमोजणी होईल. काँग्रेसचे आमदार रावसाहेब अंतापूरकर यांचे निधन झाल्याने ही जागा रिक्त होती.

निवडणूक आयोगाने देशभरातील एकूण ३३ मतदारसंघात पोटनिवडणुका जाहीर केल्या असून त्यात देगलूरचा समावेश आहे. देगलूर पोटनिवडणुकीसाठी अर्ज दाखल करण्याची मुदत आठ ऑक्टोबरपर्यंत आहे. ११ ऑक्टोबरला अर्जांची छाननी होईल. १३ ऑक्टोबरपर्यंत अर्ज मागे घेण्याची मुदत आहे. ३० ऑक्टोबर रोजी मतदान होईल.

२००९ मध्ये देगलूर - बिलोली हा राखीव मतदारसंघ झाला. २००९ मध्ये झालेल्या निवडणुकीत काँग्रेसचे रावसाहेब अंतापूरकर आमदार झाले होते. २०१४ च्या निवडणुकीत शिवसेनेचे सुभाष साबणे आमदार झाले. २०१९ च्या निवडणुकीत पुन्हा कॉँग्रेसचे अंतापूरकर आमदार झाले. २००९ आणि २०१९ च्या निवडणुकीत अंतापूरकर यांनी साबणे यांचा तर २०१४ च्या निवडणुकीत साबणे यांनी अंतापूरकर यांचा पराभव केला होता. आजारपणामुळे आमदार अंतापूरकर यांना गेल्या मार्चमध्ये मुंबईच्या रुग्णालयात दाखल करण्यात आले होते. उपचार सुरू असताना नऊ एप्रिलला त्यांचे निधन झाले. त्यामुळे या रिक्त जागेसाठी पोटनिवडणूक होत आहे.