अंबाजोगाई (बीड): तालुक्यातील लोखंडी सावरगाव परिसरातील कोविड सेंटरमधील (covid center) एका परिचारिकेसोबत काम करणाऱ्या आरोग्य कर्मचाऱ्याने दीड महिन्यापासून सतत पाठलाग करून त्रास दिला. त्यानंतर मंगळवारी ( ता.२५ ) रात्री घरात घुसून विनयभंग केल्याच्या आरोपावरून अर्जून फड ( रा. दौंडवाडी) या कर्मचाऱ्यावर येथील ग्रामीण ठाण्यात विनयभंगाचा गुन्हा नोंदविण्यात आला. तो अद्याप फरार आहे.

लोखंडी सावरगाव येथील कोविड केअर सेंटरमध्ये पिडीत परिचारिका कर्तव्य बजावते. त्यांनी दिलेल्या फिर्यादीनुसार, मागील दीड महिन्यापासून त्या राहत असलेल्या रूमचा दरवाजा रात्री -अपरात्री कोणीतरी ठोठावून जात होते. त्यांनी पाळत ठेवली असता त्यांच्या सोबतच काम करणारा अर्जून फड ( रा. दौंडवाडी) हा दरवाजा ठोठावताना आढळला .दुसऱ्या दिवशी पीडिताने अर्जुनला जाब विचारला असता तुमच्या बरोबर मला लग्न करायचे आहे, असे तो म्हणू लागला. आपण विवाहित असून यापुढे त्रास देऊ नको, असे पीडिताने त्यास बजावले होते तरीही अर्जुनने सतत पाठलाग सुरू ठेवला.

काहीही कारण सांगून तो त्रास देऊ लागला. मंगळवारी (ता.२५) रात्री साडेआठ वाजता पिडिता ड्युटी करून घरी परतली असता अर्जुनने घरात घुसून तिचा विनयभंग केला. यावेळी पिडिता आरडाओरड करताच अर्जुनने त्यांना जीवे मारण्याची धमकी दिली आणि निघून गेला. या प्रकरणी पीडिताने येथील ग्रामिण पोलिस ठाण्यात अर्जुन विरोधात विनयभंगाचा गुन्हा दाखल केला. पुढील तपास पोलिस उपनिरीक्षक मोनाली पवार करीत आहेत.