औसा (जि.लातूर) : कोरोना विरोधात चाललेल्या या युद्धात प्रशासकीय अधिकाऱ्यांना, आरोग्य अधिकारी, कर्मचारी आणि पोलीस, पत्रकार यांना प्रत्यक्ष फिल्डवर जाऊन काम करावे लागत आहे. तुमची थोडीशी चूक किंवा हलगर्जीपणा कोरोनाला आपल्या घरापर्यंत घेऊन जाऊ शकतो. त्यामुळे काम करत असताना पूर्ण सुरक्षा बाळगून घरात आल्यावर आंघोळ आणि सॅनिटाइझर करूनच पुढची कामे करा' असे आवाहन उस्मानाबादचे खासदार ओमराजे निंबाळकर यांनी केले. शनिवारी (ता.११) येथील प्रशासकीय इमारतीच्या सभागृहात प्रशासकीय अधिकाऱ्यांसोबत घेतलेल्या आढावा बैठकीत ते बोलत होते.

यावेळी उपविभागीय अधिकारी (औसा-रेणापूर )अविनाश कांबळे, उपविभागीय पोलीस अधिकारी राजीव नवले, तहसीलदार डॉ. शोभा पुजारी, तालुका आरोग्य अधिकारी डॉ. आर. आर. शेख, पुरवठा नायब तहसीलदार वर्षा मनाळे, औसा सजाचे तलाठी विकास बिराजदार आदी उपस्थित होते.
श्री. निंबाळकरांनी यावेळी सर्व स्वस्तधान्य दुकानदारांनी दर्शनी भागात मोफत कोणते धान्य आणि किती मिळेल याचा फलक लावावा, शिधापत्रिका नसणाऱ्या गरीब लोक उपाशी राहणार नाहीत याकडे लक्ष द्यावे, विलगीकरण केलेल्या लोकांना चांगले अन्न देण्यात येत असल्याची खात्री करा, बाहेरून जर कोणी येत असेल तर कोणीही सांगितले तरी त्यांना येऊ देऊ नका, प्रशासनाकडून आणि गोरगरीब लोकांना धान्य वाटत वाटत असतांना खात्री करूनच वाटप करावे.

वाचा ः राष्ट्रहिताच्या नजरेतून : उपचाराचा मध्यममार्ग

मीही वीस दिवसांनी घराबाहेर
यावेळी वैयक्तिक काळजी घेण्याची अधिकाऱ्यांना विनंती करतांना खासदार निंबाळकर म्हणाले, मी दिल्लीहून आलो आणि वीस दिवस घराच्या बाहेर पडलो नाही. कारण विमानाने येतांना अथवा दिल्लीत विषाणूच्या संपर्कात आलो असलो तर त्याचा माझ्यामुळे फैलाव होऊ नये म्हणून मी ही खबरदारी घेतली म्हणून तुम्हीही प्रथम स्वतःची काळजी घ्या असे आवाहन त्यांनी केले.