उमरगा (उस्मानाबाद) : गुलबर्गा-लातूर मार्गावर सहा आसनी रिक्षा उलटून झालेल्या अपघातात एकाचा मृत्यू झाला. तर, अन्य एक गंभीर जखमी झाला. ही घटना सोमवारी (ता. 16) सायंकाळी साडेपाचच्या सुमारास उमरगा-लातूर रोड वरील औद्योगिक प्रशिक्षण केंद्रासमोर घडली.

याबाबतची माहिती अशी, की सोमवारी सायंकाळी साडेपाचच्या सुमारास संतोष मकदूम लिंबुळे (वय 40), गंगूबाई तम्मा लिंबुळे (वय 68, रा. दोघेही तुरोरी, ता. उमरगा) हे सहा आसनी रिक्षाने (एमएच-25, एन-805) उमरग्याकडे येत असताना औद्योगिक प्रशिक्षण केंद्रासमोर उलटून झालेल्या अपघातात दोघेही गंभीर जखमी झाले होते.

जगद्‌गुरू नरेंद्राचार्य महाराज संस्थानच्या रुग्णवाहिकेतून उपजिल्हा रुग्णालयात तातडीने त्यांना दाखल करण्यात आले. या अपघातात चालक संतोष लिंबुळे याचा मृत्यू झाला असून, गंगूबाई लिंबुळे गंभीर जखमी असल्याने त्यांच्यावर उपचार सुरू आहेत. या प्रकरणी रात्री उशिरापर्यंत गुन्हा दाखल करण्याची प्रक्रिया सुरू होती.