वसमत ( जिल्हा हिंगोली ) : पुर्णा कारखाना वसाहतींमध्ये दोन ठिकाणी मारलेल्या छाप्यांमध्ये देशी व विदेशी दारुसह ९६ हजार ४४० रुपयांचा मुद्देमाल जप्त केल्याची कारवाई वसमत ग्रामीण पोलिसांनी केली.

याबाबत पोलिसांनी दिलेल्या माहितीनुसार तालुक्यातील पुर्णा कारखाना वसाहतींमध्ये अनाधिकृत देशी व विदेशी दारु विक्री होत असल्याची माहिती ग्रामीण पोलिसांना मिळाली होती. त्यानुसार ग्रामीण पोलिस ठाण्याचे सहायक पोलिस निरीक्षक विलास चवळी यांच्या मार्गदर्शनाखाली पोलिस उपनिरीक्षक ज्ञानेश्वर शिंदे, पोलिस नाईक एम. व्ही. आडे यांनी शनिवारी सायंकाळी पुर्णा कारखाना वसाहतींमध्ये सापळा रचून शेख खाजा शेख अमिन याच्या घरात अनाधिकृत देशी दारुच्या २९ बाॅटल व एक दुचाकी असा मिळून ४६ हजार ७४० रुपयांचा मुद्देमाल जप्त केला.

तर याच वसाहतींमध्ये सतिश प्रकाश मणी यांच्या घरी छापा मारुन विदेशी दारुच्या १७ बाॅटल व दुचाकी असा ४७ हजार ७२० रुपयांचा मुद्देमाल जप्त करण्यात आला आहे. दोन्ही छाप्यात मिळून ९६ हजार ४४० रुपयांचा मुद्देमाल जप्त करण्यात आला आहे. पोलिस उपनिरीक्षक ज्ञानेश्वर शिंदे यांच्या फिर्यादीवरुन ग्रामीण पोलिस ठाण्यात दोन्ही आरोपीविरुध्द गुन्हा दाखल करण्यात आला आहे.

हेही वाचा - याप्रकरणी कॉलेजच्या प्राध्यापकांनी दिलेल्या तक्रारीवरुन पोलिसांनी अनोळखी हॅकर्सविरुद्ध गुन्हा नोंदविला आहे

दारुबंदी विभागाच्या कार्यालयाचे 'अर्थ'पूर्ण दुर्लक्ष.....

शहरात शासनाचे दारुबंदी विभागाचे कार्यालय असताना तालुकाभरात मोठ्या प्रमाणात देशी- विदेशी दारुचा अनाधिकृत पुरवठा कसा होतो यावर नागरीकांनी प्रश्न उपस्थित केला आहे. यापुर्वीही याच भागात ग्रामीण पोलिसांनी छापा मारुन लाखो रुपयांची अनाधिकृत दारु जप्त केली होती. संबंधित विभागाच्या वरिष्ठ अधिकाऱ्यांनी लक्ष देऊन ग्रामीण भागात अनाधिकृत देशी व विदेशी दारु विक्री करणाऱ्या दुकानदारावर कारवाई करावी अशी मागणी नागरीकामधुन केली जात आहे.

संपादन- प्रल्हाद कांबळे