हिंगोली ः जिल्‍ह्यात कोरोनाचा एक पॉझीटिव्ह रुग्ण आढळल्यानंतर मागच्या तीन दिवसांपासून शहरात लॉकडाउन कडक करण्यात आले होते. शहरातील औषधी दुकाने वगळता इतर दुकाने बंद होती. तसेच विनाकारण फिरणाऱ्या दुचाकी, चारचाकी वाहने देखील मनाई करण्यात आली होती. नागरिकांना त्‍याला प्रतिसाद दिला होता. त्‍यानंतर सोमवारी (ता.सहा) सकाळी नऊ ते एक या वेळात लॉकडाउन शिथिल करण्यात आले होते. यामुळे शहरात आठ ठिकाणी भरलेल्या बाजारात खरेदीसाठी झुंबड उडाली होती.

जिल्‍ह्यात कोरोनाचा एक रुग्ण पॉझीटिव्ह असल्याने जिल्हा प्रशासनाने नागरिकांना गर्दी करू नये यासाठी तीन दिवस औषधी दुकाने वगळत इतर दुकाने तसेच दिवसाआड भरणारा बाजार देखील बंद केला होता. कोरोनाच्या पॉझीटिव्ह रुग्णांच्या भीतीने शहरील सर्वच गल्‍लीबोळातील रस्‍ते नागरिकांनी स्‍वतःहा बंद करून बाहेरून येणाऱ्यांसाठी बंद केली होते. यामुळे तीन दिवस शहरात कडकडीत बंद होता. प्रशासनाला नागरिकांनी देखील सहकार्य केले.

हेही वाचा - तर सुरु ठेवणार खाजगी दवाखाने, कुठे ते वाचा...

काही ठिकाणी पाळले नियम
सोमवारी लॉकडाउन शिथिल करण्यात आल्यानंतर सकाळी नऊ ते एक यावेळात शहरात पालिका प्रशासन व जिल्‍हा प्रशासनाने ठरवून दिलेल्या आठ ठिकाणी बाजार भरला होता. तर शहरातील किराणा दुकाने इतरही दुकाने उघडण्यात आली होती. शहरात भरलेल्या बाजाराच्या ठिकाणासह गांधी चौक, सदरबाजार, कपडा मार्केट, किराणा दुकानावर नागरिकांची मोठी गर्दी झाली होती. अनेकांनी मास्‍क, नाकातोंडाला रुमाल बांधून सोशल डिस्‍टन्स ठेवत दुकानात खरेदी केली तसेच एटीएमवर देखील सोशल डिस्‍टन्स ठेवत व्यवहार केले. यासाठी प्रशासनाचे अधिकारी, पोलिस अधिकारी कर्मचारी जागोजागी लक्ष ठेवून होते. नगरपालिकेचे मुख्याधिकारी रामदास पाटील हे स्‍वतः बाजाराच्या ठिकाणी जावून नागरिकांना गर्दी करू नका, असे आवाहन करीत होते.

हेही वाचा - ‘या’ जिल्ह्यात १२ एप्रिलपासून मोफत तांदुळ होणार उपलब्ध

जिल्‍हाधिकारी उतरले रस्‍त्‍यावर...
जिल्हाधिकारी रूचेश जयवंशी यांनी आज शासकीय विश्रामगृहासमोर प्रत्यक्ष रस्त्यावर उतरून दुचाकी तीन चाकी, चार चाकी वाहनांची स्वतः तपासणी केली आणि प्रत्यक्षात अनेक वाहन चालकांवर कारवाई करण्याचे आदेश पोलिसांना दिले. या वेळी उपविभागीय अधिकारी अतुल चोरमारे, उपविभागीय पोलिस अधिकारी रामेश्वर वैजने, नगरपरिषदेचे मुख्याधिकारी रामदास पाटील यांच्यासह पोलिस कर्मचारी उपस्थित होते.