उस्मानाबाद : जिल्ह्यामध्ये मोठ्या प्रमाणावर कोरोनाचा प्रादुर्भाव होऊ लागला आहे. उपचार घेत असलेल्या रुग्णाची संख्या तीन हजारांच्या पुढे जात आहे. त्यामुळे आता जिल्ह्यात बेड उपलब्ध आहेत की नाही याबाबत मोठ्या प्रमाणात संभ्रम तयार होत असल्याचे चित्र आहे. सामान्य जनतेमध्ये याची धास्ती वाढल्याने प्रशासनाकडुन जिल्ह्यामध्ये हॉस्पिटलनिहाय शिल्लक बेडची संख्या सांगणे आवश्यक बनले आहे. गेल्या काही दिवसांपासुन वाढती संख्या विचारात घेऊन अनेकांनी इतर जिल्ह्यात उपचार घेण्यासाठी धावाधाव केल्याचे पाहायला मिळत आहे. जिल्ह्यामध्ये असलेली शासकीय रुग्णालयाची क्षमता तशी राज्यामध्ये सर्वाधिक असल्याचे सांगितले जात आहे. साडेतीनशेच्या जवळपास जिल्हा शासकीय रुग्णालय इमारतीमध्ये कोरोनाचे रुग्णावर उपचार घेण्याची सोय आहे.

धरसोड वृत्तीतून घेतलेल्या निर्णयांमुळे महाराष्ट्रात कोरोनाचा प्रकोप वाढला - भागवत कराड

एवढी क्षमता असल्याने जिल्ह्याला मोठा फायदा झालेला आहे. शिवाय औषधी किंवा ऑक्सिजनचा तुटवडा शासकीय रुग्णालयामध्ये आतापर्यंत भासलेला नाही. त्याचे नियोजन अत्यंत चांगले असुन त्यामुळे अधिकाधिक रुग्णांना आता शासकीय रुग्णालयामध्ये जाण्याची इच्छाही निर्माण होत आहे. त्याअगोदर रुग्णालयामध्ये जागा शिल्लक नसल्याच्या अफवा बाहेर मोठ्या प्रमाणात सूरु आहे. त्यामुळे शासकीय ऐवजी खासगीकडे पहिल्यांदा विचारणा होत आहॆ. पण सध्याच्या स्थितीला ऑक्सिजन किंवा इंजेक्शनच्या अभावी अनेक ठिकाणी अडचणी निर्माण होत आहे.

मैत्रीच्या नात्याला काळिमा फासणारी घटना, पतीच्या मित्रानेच पत्नीवर तीन वर्षे अत्याचार करुन उकळले पैसे

साहजिकच त्यामुळे रुग्णाला थेट बार्शी किंवा सोलापुरला उपचारासाठी जावे लागत असल्याची वस्तुस्थिती आहे. अशा गोंधळाच्या परिस्थितीमध्ये जर प्रशासनाने बेडची संख्या जाहीर केली तर गोंधळाची परिस्थिती निर्माण होणार नाही. सध्या कुठे किती बेड शिल्लक आहेत, याची माहिती मिळणे अत्यंत महत्त्वाचे बनले आहे. वाढती रुग्णसंख्या असल्याने अगोदरच लोकांमध्ये मोठ्या प्रमाणात भितीचे वातावरण आहे. साहजिकच त्यांना उपचाराची सोय कुठे उपलब्ध होईल याचा जरी अंदाज असेल तर मोठा ताण कमी होणार आहे. त्यामुळे दररोजची शिल्लक बेडची संख्या जाहीर करण्याची आवश्यकता आहे. 
 

संपादन - गणेश पिटेकर