लोहारा (जि.उस्मानाबाद) : तालुक्यातील सालेगाव येथे एका ४२ वर्षीय व्यक्तीच्या डोक्यात घातक हत्याराने वार करून खून केल्याची घटना शनिवारी (ता.तीन) उघडकीस आली. या प्रकरणी पोलिस ठाण्यात अज्ञात आरोपीविरोधात रात्री उशीरा गुन्हा दाखल करण्यात आला आहे.गोविंद व्यंकट करदोरे (वय ४२) असे मृताचे नाव आहे. गोविंद करदोरे यांना तीन एकर शेती आहे. शेतात कांद्याची लागवड केली आहे. शेतीसाठी रात्री वीजपुरवठा करण्यात येतो. त्यामुळे गोविंद हे आपल्या आईसोबत कांद्याला पाणी देण्यासाठी शुक्रवारी रात्री मुक्कामासाठी शेतात गेले होते.

कांद्याला पाणी देत असताना मध्यरात्रीच्या सुमारास काही अज्ञात व्यक्तीने गोविंद यांच्या डोक्यात घातक हत्याराने वार करून जखमी केले. यात त्यांचा जागीच मृत्यू झाला. शनिवारी (ता.तीन) पहाटे साडेपाचच्या सुमारास गोविंद यांचा शोध घेतला असता शेतातील विहिरीलगत त्यांचा मृतदेह आई रूक्मिणी यांना मिळून आला. घटनेची माहिती मिळताच अपर पोलिस अधीक्षक, तुळजापूरचे उपविभागीय पोलिस अधिकारी, लोहारा ठाण्याचे पोलिस निरीक्षक यांनी घटनास्थळाला भेट दिली. दरम्यान, उस्मानाबाद येथील श्वान पथकाला पाचारण करण्यात आले. परंतु  आरोपींचा सुगावा लागला नाही. मृत गोविंद यांच्या आई रूक्मिणी यांनी दिलेल्या फिर्यादीवरून शनिवारी रात्री अज्ञात व्यक्तीविरोधात गुन्हा दाखल केला. पुढील तपास पोलिस निरीक्षक धरमसिंग चव्हाण करीत आहेत.

Edited - Ganesh Pitekar