परभणी : देश-विदेशातील कृषी क्षेत्राशी संबंधित नामांकित संस्‍थेतील शास्‍त्रज्ञ व प्राध्‍यापक आणि परभणी कृषी विद्यापीठातील शास्‍त्रज्ञ, प्राध्‍यापक व विद्यार्थी यांच्यात कृषी संशोधनाबाबत सातत्‍याने विचारांची देवाणघेवाण होणे आवश्‍यक आहे. यामुळे विद्यापीठातील संशोधनास दिशा मिळेल. याकरिता परभणी कृषी विद्यापीठ देश-विदेशातील विविध नामांकित संस्‍थेशी सामंजस्‍य करार करून प्रशिक्षणाच्‍या माध्यमातून विविध विषयांत शास्‍त्रज्ञ व विद्यार्थी यांच्‍या कौशल्‍य विकासावर भर दिला जात आहे, अशी माहिती कुलगुरू डॉ. इंद्र मणी यांनी दिली.(Parbhani News)

वसंतराव नाईक मराठवाडा कृषी विद्यापीठातील शास्‍त्रज्ञ व प्राध्‍यापकांशी अमेरिकेतील पर्ड्यू विद्यापीठातील कृषी आणि जीवशास्‍त्रीय अभियांत्रिकीचे शास्‍त्रज्ञ वरिष्ठ प्राध्‍यापक डॉ. धर्मेंद्र सारस्‍वत यांनी १२ डिसेंबर रोजी संवाद साधला. संवाद कार्यक्रमाच्‍या अध्‍यक्षस्‍थानी कुलगुरू डॉ. इंद्र मणी होते. अमेरिकेतील पर्ड्यू विद्यापीठातील कृषी आणि जीवशास्‍त्रीय अभियांत्रिकीचे वरिष्ठ प्रा. डॉ. धर्मेंद्र सारस्‍वत, आयआयटी मुंबईचे प्रा. ईश्‍वर राजशेखर, शिक्षण संचालक डॉ. धर्मराज गोखले, प्राचार्य डॉ. सय्यद इस्माईल, प्राचार्य डॉ. उदय खोडके, प्राचार्य डॉ. राजेश्‍वर क्षीरसागर आदींची प्रमुख उपस्थिती होती.

डॉ. धर्मेंद्र सारस्‍वत म्‍हणाले की, अनेक भारतीय शास्‍त्रज्ञ विदेशात कृषी संशोधनात योगदान देत आहेत. भारतीय शेती पुढे अनेक आव्‍हाने आहेत. अमेरिकेतील व इतर देशातील कृषी संशोधन क्षेत्रातील ज्ञान व तंत्रज्ञान भारतीय शेतीस उपयुक्‍त ठरू शकते. याकरिता देशविदेशातील संशोधन संस्‍थेशी परभणी कृ‍षी विद्यापीठाची नाळ जोडण्‍याची आवश्‍यकता असल्‍याचे सांगून त्‍यांनी आंतरराष्ट्रीय स्तरावरील संशोधन भारतात आणि विशेषतः महाराष्‍ट्रात कशा प्रकारे राबविता येईल, यावर मार्गदर्शन केले.

संशोधन क्षेत्रात आयआयटी मुंबई जास्‍तीत- जास्‍त तळागाळातील संस्‍था व व्‍यक्‍तीशी संबंध जोडण्‍याचा प्रयत्‍न करित असल्‍याचे आयआयटी मुंबईचे प्रा. ईश्‍वर राजशेखर यांनी सांगितले. प्रास्‍ताविक व प्रमुख पाहुण्यांचा परिचय प्राचार्य डॉ. उदय खोडके यांनी करून दिला. डॉ. सचिन मोरे यांनी सूत्रसंचालन केले.