परभणी : कोरोना विषाणूचा प्रादुर्भाव रोखण्यासाठी लॉकडाऊनचा कालावधी वाढविण्याचे आदेश जिल्हाधिकारी दीपक मुगळीकर यांनी सोमवारी (ता. १३) जाहीर केले. ता. १४ पासून ते ३० एप्रिलपर्यंत जिल्ह्यातील लॉकडाऊन कायम राहणार आहे.

कोरोना विषाणूचा प्रादुर्भाव रोखण्यासाठी पंतप्रधान नरेंद्र मोदी यांनी २३ मार्च ते १४ एप्रिलपर्यंत लॉकडाऊन जाहीर केले होते. २१ दिवसांच्या लॉकडाऊनचा कालावधी मंगळवारी (ता. १४) संपत आला होता. परंतु, मुख्यमंत्री उद्धव ठाकरे यांनी या बाबत दोन दिवसांपूर्वीच निर्णय जाहीर केला होता. त्यानुसार ता. ३० एप्रिलपर्यंत राज्यात लॉकडाऊन राहणार असल्याचे घोषित केले होते. परंतु, काही जिल्हे ग्रीन झोनमध्ये असल्याने या जिल्ह्यात शिथिलता देण्यात येऊ शकते, असे बोलल्या जात होते. परंतु, सोमवारी (ता. १३) जिल्हाधिकारी दीपक मुगळीकर यांनी दुपारी नवीन आदेश काढले आहेत. यात जिल्ह्यातील लॉकडाऊन ता. ३० एप्रिलपर्यंत वाढविण्याचे आदेश दिले आहेत. त्यामुळे परभणी जिल्ह्यात येत्या १५ दिवसांसाठी परत लॉकडाऊन होणार आहे, हे मात्र निश्चित.

हेही वाचा - गुटख्याने भरलेल्या कारला पोलिसांनी पकडले

व्हॉटसअप ग्रुपची द्यावी लागणार माहिती
जिल्हयातील व्हॉटसअप ग्रुपची माहिती जिल्हा प्रशासन गोळा करत असून त्यासाठी संबंधीत ग्रुप ॲडमीनला त्याच्या ग्रुपची माहिती ऑनलाईन भरावी लागणार आहे. सध्याच्या परिस्थितीत कोणतीही अफवा पसरविली जाऊ नये यासाठी खबरदारीचा उपाय म्हणून प्रशासनाच्यावतीने हे पाऊल उचलण्यात आले आहे.

हेही वाचा -   गावाकडे परतण्यासाठी वडील गेल्याचा रचला बेबनाव

कोरोना विषाणुचा प्रादुर्भाव झाल्यापासून सोशल मिडियाच्या माध्यमातून वेगवेगळे संदेश पसरविले जात आहेत. त्यात व्हॉटसअप हे माध्यम अत्यंत प्रभावी आहे. या माध्यमातून लोकांनी ग्रुप तयार केले असून या ग्रुपवर शेकडो लोक एका ठिकाणी असतात. त्यामुळे एखादी चुकीची माहिती काही सेकंदातच संपूर्ण राज्यात पसरते. त्यामुळे सध्याच्या कोरोना विषाणु प्रादुर्भावाच्या परिस्थितीत कुठहीली चुकीची माहिती लोकांपर्यत जावून लोक भयभित होऊ नये यासाठी जिल्हाधिकारी दीपक मुगळीकर यांनी सोमवारी (ता.१३) व्हॉटसअप ग्रुपच्या ॲडमीनकडून त्यांच्या ग्रुपची माहिती संकलीत करणे सुरु केले आहे. त्यात त्या ग्रुपचे नाव, ग्रुपच्या ॲडमीनची संख्या, ग्रुपमधील सदस्यांची संख्या त्यांचे मोबाईल नंबर याची माहिती विचारली जात आहे. तसेच माहिती पूर्ण भरल्यानंतर एक प्रतिज्ञापत्र देखील येत आहे. त्यात या ग्रुपवर कोणतीही खोटी माहिती पसरविली जाणार नाही त्याची काळजी मी स्वता घेतो. असे झाल्यास मी शिक्षेस पात्र राहिल असे प्रतिज्ञापत्र लिहून घेतले जात आहे.