परभणी : स्थानिक गुन्हे शाखेच्या पथकाने वांगी (ता. मानवत) येथे सुरु असलेल्या अवैध वाळू उपश्यावर रविवारी (ता. चार) सायंकाळी सहाच्या सुमारास छापा मारत दोन पोकलेन, जेसीबी मशीनसह सुमारे दोन कोटी रुपयांचा मुद्देमाल जप्त केला आहे.

मानवत तालुक्यातील वांगी येथे अवैध वाळू उपसा सुरु असल्याची माहिती स्थानिक गुन्हे शाखेला मिळाली होती. त्यावरुन स्थानिक गुन्हे शाखेचे फौजदार विश्वास खोले, फौजदार चंद्रकांत पवार यांनी ही बाब जिल्हा पोलिस अधीक्षक जयंत मीना, अतिरिक्त पोलिस अधीक्षक मुम्मका सुदर्शन यांना सांगितली. श्री. मीना यांच्या मार्गदर्शनाखाली चंद्रकांत पवार, फौजदार विश्वास खोले यांच्यासह कर्मचारी सुग्रीव केंद्रे, शंकर गायकवाड, यशवंत वाघमारे, विष्णू भिसे, अजहर पटेल, दीपक मुदीराज, अरुण कांबळे, दीपक मुंडे यांच्या पथकाने रविवारी सायंकाळी सहाच्या सुमारास मिळालेल्या माहितीच्या ठिकाणी छापा मारला. त्यावेळी तेथे वाळू उपसा मोठ्या प्रमाणात सुरु असल्याचे पथकाच्या निदर्शनास आले. पथकातील अधिकारी- कर्मचाऱ्यांनी वाळू उपश्यासाठी वापरण्यात येत असलेले दोन पोकलेन, एक जेसीबी मशीन, पाच टिप्पर, सात ट्रॅक्टर, एक लोडर असा अंदाजे दोन कोटी रुपयांचा मुद्देमाल ताब्यात घेतला अशी माहिती स्थानिक गुन्हे शाखेच्या सुत्रांनी दिली.

हेही वाचा - नांदेड : दोषींवर कडक कारवाई करा पण निरपराध्यांना त्रास देवू नका; काँग्रेसची मागणी

जिल्हाभरात वाळू उपश्याचे अवैध काम

जिल्हाभरात वाळू उपश्याचे अवैध काम मोठ्या प्रमाणात सुरु आहे. परंतू यावर पाहिजे त्या प्रमाणात कारवाई होतांना दिसत नाही. गेल्या काही दिवसापासून पोलिसांकडून असे छापे मारण्याचे काम सुरु असले तरी महसुल प्रशासना त्या- त्या तालुक्यातील वाळू उपश्यावर लक्ष देत नसल्याच्या तक्रारी वाढल्या आहेत. विशेषता पाथरी, सोनपेठ, गंगाखेड व पूर्णा तालुक्यातून वाहणाऱ्या गोदावरी नदी पात्रातूनही वाळूची चोरटी वाहतुक होत असते. यातून करोडो रुपयांची उलाढाल होत आहे.

संपादन- प्रल्हाद कांबळे